Գրիպի պատվաստումը կարող է պաշտպանել սիրտը․ նվազում է ինֆարկտի և ինսուլտի ռիսկը

Գիտնականները պարզել են, որ գրիպի դեմ պատվաստումը կարող է զգալիորեն նվազեցնել ինֆարկտի և ինսուլտի ռիսկը նույնիսկ այն մարդկանց մոտ, ովքեր վարակվում են վիրուսով։ Ինչպես հայտնում է Eurosurveillance գիտական հանդեսը, ուսումնասիրությունը ցույց է տալիս, որ պատվաստումն ունի ոչ միայն կանխարգելիչ, այլև պաշտպանիչ ազդեցություն բարդությունների դեմ։

Հետազոտության ընթացքում վերլուծվել են Դանիայում 40 տարեկանից բարձր 1221 մարդու տվյալներ։ Պարզվել է, որ գրիպով վարակվելուց հետո առաջին շաբաթվա ընթացքում ինֆարկտով հոսպիտալացման ռիսկը աճում է մոտ հինգ անգամ, իսկ ինսուլտի դեպքում՝ երեք անգամ։ Սակայն պատվաստված մարդկանց մոտ այս հավելյալ ռիսկը մոտ երկու անգամ ավելի ցածր է եղել, նույնիսկ եթե նրանք նույնպես հիվանդացել են։

Ուսումնասիրության հեղինակները նշում են, որ պատվաստումը պաշտպանում է ոչ միայն վարակումից, այլև դրա ծանր հետևանքներից՝ հատկապես սրտանոթային համակարգի համար։ Նրանց կարծիքով՝ այս տվյալները կարող են դառնալ կարևոր փաստարկ պատվաստումների օգտին, հատկապես բարձր ռիսկային խմբերի համար։