Մադագասկարում կանխվել է հեղաշրջման փորձ․ իշխանությունները հայտարարում են նաև նախագահի դեմ մահափորձի մասին

Մադագասկարում իրավապահները հայտարարել են պետական հեղաշրջման փորձի և նախագահի դեմ մահափորձի կանխման մասին։ Ինչպես հայտնում է L'Express de Madagascar-ը, գլխավոր դատախազ Նարինդրա Ռակոտոնիաինան նշել է, որ գործով արդեն ձերբակալվել է 11 մարդ, ևս երկուսը գտնվում են հետախուզման մեջ։

Ըստ պաշտոնական տվյալների՝ կասկածյալների թվում կան զինվորականներ, այդ թվում՝ բարձրաստիճան սպաներ և մեկ գեներալ։ Քննության տվյալներով՝ նրանք ներգրավված են եղել երկար ժամանակ նախապատրաստվող գործողության մեջ, որը նպատակ ուներ տապալել իշխանությունը և վնաս հասցնել երկրի ղեկավարին։

Խուզարկությունների ընթացքում իրավապահները հայտնաբերել են մեծ քանակությամբ զենք և խոշոր գումարներ։ Իշխանությունները որպես գործողության կազմակերպիչներից մեկին նշել են նախկին բարձրաստիճան զինվորական Պատրիկ Ռակոտոմամոնջիին, ով նախկինում աշխատել է նախագահի վարչակազմում։ Դեպքը լուրջ մտահոգություն է առաջացրել երկրի քաղաքական կայունության շուրջ՝ այն ֆոնին, երբ Մադագասկարը փորձում է ակտիվացնել իր միջազգային դիրքերը, այդ թվում՝ հետաքրքրված է ԲՐԻԿՍ-ին միանալով։