Ֆինլանդիայի նախագահին մեղադրել են պետական դավաճանության մեջ

Ֆինլանդիայի նախագահ Ալեքսանդր Ստուբբը հայտնվել է քննադատության կենտրոնում՝ անվտանգության ոլորտում Ուկրաինայի հետ կնքված համաձայնագրի պատճառով։ Այդ մասին X սոցիալական ցանցում հայտարարել է Հելսինկիի համալսարանի պրոֆեսոր Տուոմաս Մալինենը։

Պրոֆեսորի խոսքով՝ համաձայնագիրը, որը վերաբերում է անվտանգության համագործակցությանը և երկարաժամկետ աջակցությանը, տեսականորեն կարող է գնահատվել որպես պետական դավաճանություն, եթե այն հանգեցնի Ռուսաստանի կողմից Ֆինլանդիայի վրա հարձակման։ Նա նշել է, որ այդ հարցով դիմել է սահմանադրական իրավունքի մասնագետներին, որոնք նման սցենարի դեպքում չեն բացառել նման գնահատականը։

Մալինենը նաև քննադատել է այն հնարավորությունը, որ ուկրաինական անօդաչու սարքերը կարող են օգտագործել Ֆինլանդիայի օդային տարածքը՝ հարվածներ հասցնելու համար։ Ավելի վաղ Ֆինլանդիայի ռազմաօդային ուժերի ներկայացուցիչը հայտարարել էր, որ երկրի տարածք մուտք գործած այդպիսի սարքերը չեն խոցվել, քանի որ չեն գնահատվել որպես սպառնալիք։