Տղամարդիկ ամբողջ աշխարհում սկսում են խուսափել սեռական հարաբերություններից՝ առողջության և էներգիայի համար

Ամբողջ աշխարհում աճում է մի նոր միտում, որի հետևորդները հրաժարվում են սեռական հարաբերություններից և նույնիսկ ինքնաբավարարվելուց՝ համոզված լինելով, որ սերմնահեղուկի «պահպանումը» օգնում է լինել ավելի առողջ, էներգիայով լի և ինքնավստահ։ Այս երևույթը, որը հայտնի է որպես «սերմի պահպանում» (semen retention), լայն տարածում է գտնում օնլայն համայնքներում, որտեղ հազարավոր տղամարդիկ կիսվում են իրենց փորձով և խրախուսում միմյանց։

Նրանց համոզմամբ՝ սերմնահեղուկի յուրաքանչյուր կորուստ նվազեցնում է կենսական ուժը, իսկ դրա պահպանումը կարող է բարելավել կենտրոնացումը, ֆիզիկական կարողությունները և նույնիսկ հաջողությունը կանանց մոտ։ Սակայն բժիշկներն ընդգծում են, որ այս տեսակետը գիտականորեն հիմնավորված չէ։ Թեև որոշ հետազոտություններ ցույց են տվել կարճաժամկետ հորմոնային փոփոխություններ, դրանք չեն ունենում երկարաժամկետ ազդեցություն տղամարդու առողջության վրա։

Մասնագետների խոսքով՝ սեռական ակտիվությունը կարող է ունենալ նաև դրական ազդեցություն՝ բարելավել տրամադրությունը, նվազեցնել սթրեսը և նույնիսկ նվազեցնել շագանակագեղձի քաղցկեղի ռիսկը։ Միևնույն ժամանակ, չափազանց երկարատև զսպվածությունը կարող է առաջացնել անհարմարություններ՝ ցավ, քնի խնդիրներ և հոգեբանական լարվածություն։ Սակայն որոշ տղամարդկանց համար այս պրակտիկան կարող է օգնել վերահսկել վարքագիծը և կենտրոնանալ կյանքի այլ ոլորտների վրա, գրում է Lenta.ru-ն։