Ռուսաստանում անկանխիկ վճարումները խափանվել են․ լայնածավալ խնդիր Vendista համակարգում

Ռուսաստանում լայնածավալ խափանում է գրանցվել անկանխիկ վճարումների Vendista համակարգում, որը կիրառվում է բենզալցակայաններում, վենդինգ սարքերում, ավտոլվացման կետերում, կայանատեղիներում և փոքր բիզնեսում։ Խնդրի մասին հայտնում է «Осторожно, новости» Telegram ալիքը՝ նշելով, որ խափանումը սկսվել է առավոտյան ժամերից։

Օգտատերերի խոսքով՝ քարտով վճարում կատարելիս տերմինալների էկրաններին հայտնվում է «բանկում ուշացում» հաղորդագրությունը։ Թեև QR կոդով վճարման տարբերակը շարունակում է գործել, այն նույնպես իրականացվում է դանդաղ և դժվարությամբ, ինչը լուրջ խնդիրներ է ստեղծում ծառայություններից օգտվողների համար։

Խափանման պատճառները դեռևս անհայտ են։ Ավելի վաղ Forbes-ը հաղորդել էր, որ ապրիլի 3-ին Ռուսաստանի բանկային համակարգերում գրանցված խնդիրները կարող էին կապված լինել ինտերնետային ռեսուրսների արգելափակման աշխատանքների հետ։ Նույն օրը բազմաթիվ օգտատերեր տարբեր շրջաններից հայտնել էին նաև բանկային հավելվածների զանգվածային խափանումների մասին։