CNN․ Հաիթիում նոր օտարերկրյա ուժեր՝ հին խնդիրների դեմ․ կկրկնվի՞ ձախողումը

Հաիթիում պատրաստվում են տեղակայվել նոր միջազգային ուժեր՝ երկրի տարածքում գործող զինված խմբավորումների դեմ պայքարելու նպատակով։ ՄԱԿ-ի աջակցությամբ ձևավորվող «Gang Suppression Force» (GSF) ուժը պետք է ապրիլից փոխարինի նախորդ՝ քենիական առաջնորդությամբ իրականացված առաքելությանը, որը լայնորեն գնահատվել էր որպես ձախողված։ Այս անգամ նախատեսվում է մինչև 5,500 զինծառայողի ներգրավում և ավելի լայն լիազորություններ՝ հանցավոր խմբերի դեմ անմիջական գործողությունների համար։

Հաիթիում ճգնաժամը սրվել է 2021 թվականին նախագահ Ժովենել Մոիզ-ի սպանությունից հետո, երբ իշխանական վակուումը թույլ տվեց խմբավորումներին ընդլայնել իրենց վերահսկողությունը։ Այսօր նրանք վերահսկում են մայրաքաղաք Պորտ-օ-Պրենս-ի մինչև 85 տոկոսը՝ փակելով ճանապարհներ, նավահանգիստներ և օդանավակայաններ։ Մարդասիրական իրավիճակը կտրուկ վատթարացել է՝ հազարավոր զոհերով և ավելի քան մեկ միլիոն տեղահանվածներով։

Չնայած նոր առաքելության մեծածավալությանը, փորձագետները կասկածի տակ են դնում դրա արդյունավետությունը։ Նախորդ ուժերը տառապում էին ֆինանսավորման, տեխնիկայի և մարդկային ռեսուրսների պակասից, իսկ այժմ էլ դեռ պարզ չէ՝ ինչ չափով և ինչպես են երկրները մասնակցելու նոր նախաձեռնությանը։ Միաժամանակ բարձրանում են նաև մարդու իրավունքների հետ կապված մտահոգություններ, քանի որ ավելի ագրեսիվ գործողությունները կարող են հանգեցնել խաղաղ բնակչության շրջանում զոհերի։ Նոր առաքելության հաջողությունը դեռևս անորոշ է, և շատերը հարց են տալիս՝ արդյոք այս անգամ արդյունքը տարբեր կլինի։