Axios. ԱՄՆ հատուկ նշանակության ուժերը փրկել են Իրանում խոցված F-15 կործանիչի անձնակազմի երկրորդ անդամին

Ամերիկյան հատուկ նշանակության ուժերը փրկել են Իրանի տարածքում խոցված F-15E կործանիչի անձնակազմի երկրորդ անդամին։ Այս մասին հայտնել է Axios-ը՝ հղում անելով իր աղբյուրներին։

Աղբյուրի փոխանցմամբ՝ հատուկ նշանակության ուժերի ստորաբաժանումը աջակցություն է ստացել ամերիկյան օդուժից։ «Ամերիկյան բոլոր ուժերը դուրս են բերվել թշնամու տարածքից»,- նշում է աղբյուրը։

Երկտեղանոց F-15E կործանիչը խոցվել է Իրանի տարածքում ապրիլի 3-ին։ Axios-ի փոխանցմամբ՝ ինքնաթիռից դուրս գալուց հետո անձնակազմի երկու անդամներն էլ՝ օդաչուն և նավիգատորը, հաջողությամբ կապ են հաստատել միմյանց հետ։ Աղբյուրը նշել է, որ օդաչուն փրկվել է ինքնաթիռի անկումից մի քանի ժամ անց։ Որոնողական-փրկարարական գործողության ընթացքում Իրանը խոցել է դրան մասնակցող ամերիկյան Black Hawk ուղղաթիռներից մեկը. անձնակազմի անդամները վիրավորվել են, բայց օդաչուն կարողացել է փախչել։

Նավիգատորին գտնելու համար պահանջվել է մեկ օրից ավելի։ Փրկարարական գործողությունը սկսվել է ապրիլի 4-ին։ Մինչդեռ ԱՄՆ ռազմաօդային ուժերի կործանիչները հարվածել են տարածքում տեղակայված իրանական ուժերին՝ կանխելու համար, որ նրանք գտնեն անձնակազմի երկրորդ անդամին, նախքան դա կանեն ԱՄՆ հատուկ նշանակության ուժերը։

ԱՄՆ նախագահ Դոնալդ Թրամփը Truth Social-ում հաստատել է երկրորդ օդաչուի փրկության մասին լուրը՝ նշելով, որ նա վիրավոր է, բայց «ողջ և առողջ է»։