Կառավարությունը սահմանել է գրաֆիտացված էլեկտրոդների արտոնյալ ներմուծման ընթացակարգ

ՀՀ Կառավարության կողմից հաստատվել է «Չինաստանի Ժողովրդական Հանրապետության ծագում ունեցող ԵԱՏՄ ԱՏԳ ԱԱ 8545 11 002 0 ծածկագրին դասվող վառարաններում օգտագործվող գրաֆիտացված էլեկտրոդների՝ առանց հակագնագցման տուրքի վճարման Հայաստանի Հանրապետության տարածք ներմուծման ընթացակարգը հաստատելու մասին» Հայաստանի Հանրապետության Կառավարության որոշումը /02.04.2026, N 426-Ն/։ 

Որոշումն ուղղված է պատշաճ ապահովելու 2025 թվականի դեկտեմբերի 16-ի ԵՏՀ Կոլեգիայի «Եվրասիական տնտեսական հանձնաժողովի կոլեգիայի 2025 թվականի նոյեմբերի 17-ի № 101 որոշման մեջ փոփոխություններ կատարելու մասին» № 130 որոշման կիրառումը։ ԵՏՀ Կոլեգիայի որոշմամբ Հայաստանի Հանրապետության համար սահմանվել է հակագնագցման տուրքի վճարումից ազատում ՀՀ տարածք ներմուծվող Որոշման մեջ նախատեսված ապրանքի համար՝ տարեկան 700 տոննա ծավալով։ Վերոնշյալ հակագնագցման տուրքը գործելու է 5 տարի ժամկետով։

Ուշադրություն Մաքսատուրքի վճարումից ազատումը տրամադրվելու է տնտեսվարող սուբյեկտներին բացառապես ՀՀ էկոնոմիկայի նախարարության կողմից տրամադրված՝ ՀՀ տարածք ներմուծվող առանձին տեսակի ապրանքների նպատակային նշանակությունը հաստատող եզրակացությունը ներկայացնելու դեպքում, որը տրամադրվելու է 2015 թվականի մարտի 10-ի ՀՀ Կառավարության № 228-Ն որոշմամբ սահմանված կարգով։