Սիրելի՛ մայրեր և քույրեր, մենք չենք ասում միայն շնորհավոր, ասում ենք՝ շնորհակալություն․ Հայր Ռուբեն

Մասյացոտնի թեմի առաջնորդական տեղապահ Ռուբեն վարդապետ Զարգարյանը շնորհավորական ուղերձ է հղել Ավետման տոնի առիթով։

««Օրհնեալ ես դու ի կանայս,

և օրհնեալ է պտուղ որովայնի քո» (Ղուկ․ Ա 42)

Ավետման տոնի լուսաշող այս օրը, երբ երկինքը բացվում է երկրի առջև, և հավիտենության լռությունը մուտք է գործում պատմության մեջ, հիացումով խորհում ենք Սուրբ Աստվածամոր խորհրդավոր «այո»-ի շուրջ։ Մի հեռավոր իրադարձություն չէ, որ տոնախմբում ենք, այլ ճանաչում ենք այն ապրեցնող կոչումը, որ դրոշմված է ամեն կնոջ սրտում՝ ընդունելու, պահպանելու և պարգևելու կյանքը։

Դեռատի Մարիամը երկնքի պատգամաբերի խոսքից ամեն ինչ չէ, որ ըմբռնեց, սակայն հավատաց։ Չունենալով բոլոր պատասխանները՝ ամբողջովին ապավինեց Աստծուն։ Ահա սա է հավատի գագաթնակետը՝ ոչ թե ամեն ինչ իմանալը, այլ լիակատար վստահելը։ Այսպես մարդկային ազատությունը հանդիպեց աստվածային շնորհին՝ ծնունդ տալով աշխարհի փրկությանը։

Սիրելի՛ մայրեր և քույրեր, ձեր կյանքն ունի նույն կոչման խորհուրդը։ Մեր ժողովրդի տառապանքով լի պատմության մեջ, որը նշանավորվել է թե՛ ցավով, թե՛ անսասան հավատքով, դուք եղել և մնում եք Աստվածածնի կենդանի պատկերը՝ հույսի լուռ պահապանները, փորձության մեջ՝ ամուր, սիրո մեջ՝ հավատարիմ։

Լռության մեջ մատուցված ձեր ամեն զոհողություն, գիշերվա մեջ շշնջված ձեր ամեն աղոթք խորհրդավոր կերպով մասնակցությունն է այն «թող լինի»-ին, որը փոխեց պատմության ընթացքը։ Ձեր մեջ շարունակում է մարմնավորվել աստվածային այն տրամաբանությունը, որով խոնարհությունը ծնում է մեծություն, նվիրումը՝ կյանք, իսկ հավատը՝ հաղթանակ վախի հանդեպ։

Այս տոնը նշելով՝ մենք ձեզ չենք ասում միայն «շնորհավոր», այլ ասում ենք՝ «շնորհակալություն»։ Երախտագիտություն, քանի որ Աստվածամոր հանգույն՝ դուք ամեն օր հնարավոր եք դարձնում կյանքի, հավատի և հույսի հրաշքը։ Երախտագիտություն, քանի որ աշխարհին սովորեցնում եք ճշմարիտ զորությունը ոչ թե տիրելու, այլ նվիրվելու։

Շնորհավոր և օրհնյալ Ավետման տոն։

Թող ձեր «այո»-ն շարունակի կյանք պարգևել մեր աշխարհին»։