Ուկրաինական «Flamingo» հրթիռների արտադրողը սպառնում է Մոսկվային․ խոստանում են «մասշտաբային փոփոխություններ»

Ուկրաինական Fire Point ընկերության համասեփականատեր և գլխավոր կոնստրուկտոր Դենիս Շտիլերմանը հայտարարել է, որ ընկերությունը կարող է արդեն 2027 թվականին խոցել առաջին բալիստիկ հրթիռը և նոր հեռահար հարվածներով «մասշտաբային փոփոխություններ» առաջացնել Ռուսաստանում։ Նրա խոսքերը փոխանցում է Reuters գործակալությունը՝ ընդգծելով, որ խոսքը վերաբերում է նոր սերնդի զինատեսակների մշակմանը։

Շտիլերմանի խոսքով՝ Fire Point-ը հաջորդ տարի կարող է սկսել նոր հակաօդային պաշտպանության համակարգի արտադրություն՝ եվրոպական գործընկերների հետ բանակցությունների արդյունքում։ Նշվում է, որ հակահրթիռի արժեքը կարող է կազմել մեկ միլիոն դոլարից պակաս, ինչը, ըստ նրա, կարող է «հեղափոխական փոփոխություն» բերել շուկայում։ Միաժամանակ նախատեսվում է մոտ ապագայում ռազմական կիրառության մեջ դնել FP-7 հրթիռը՝ շուրջ 300 կմ գործողության շառավղով, որը համեմատվում է ամերիկյան ATACMS համակարգի հետ։

Ավելի հզոր FP-9 հրթիռը, որը կարող է կրել մինչև 800 կգ մարտագլխիկ և խոցել մինչև 850 կմ հեռավորության թիրախներ, պատրաստվում է անցնել փորձարկումներ։ Շտիլերմանը հայտարարել է, որ նույնիսկ ուժեղ հակաօդային պաշտպանությամբ պաշտպանված Մոսկվայի ուղղությամբ հարվածները կարող են ազդել Ռուսաստանի հասարակության և ղեկավարության մտածելակերպի վրա։ Նա նաև նշել է, որ ընկերությունը դիտարկում է արբանյակների արտադրության հնարավորությունը՝ հնարավոր համագործակցությամբ Էմիրությունների Edge Group-ի հետ։