Հայիթիում երեխաները դարձել են հանցավոր խմբավորումների կեսը․ նրանց սպասվում է բախում միջազգային ուժերի հետ

Հայիթիում գործող զինված խմբավորումների մոտ կեսը կազմված է երեխաներից, և նրանք կարող են շուտով հայտնվել միջազգային նոր ուժերի դեմ առ դեմ։ Այս մասին հայտնում է CNN-ը՝ նշելով, որ ՄԱԿ-ի տվյալներով միայն 2024 թվականին առնվազն 302 երեխա ներգրավվել է հանցավոր խմբերի կազմում՝ հիմնականում մասնակցելով մարտական գործողություններին։

Երկրում խորացող սոցիալ-տնտեսական ճգնաժամը, աղքատությունն ու անապահովությունը երեխաներին մղում են հանցավոր խմբերի շարքերը։ UNICEF-ի տվյալներով՝ 2025 թվականին նման ներգրավվածությունը աճել է շուրջ 200%-ով։ Խմբավորումները ակտիվորեն օգտագործում են սոցիալական ցանցերը՝ երիտասարդներին գրավելու համար՝ ցուցադրելով փող, զենք և «կյանքի լավ պայմաններ»։ Շատ դեպքերում երեխաները միանում են գոյատևելու համար՝ ստանալով սնունդ, կացարան և նույնիսկ գումար՝ տարբեր հանցավոր գործողությունների դիմաց։

Միևնույն ժամանակ, միջազգային հանրությունը պատրաստվում է ուժեղացնել ներկայությունը երկրում․ նախատեսվում է տեղակայել շուրջ 5500 հոգուց բաղկացած բազմազգ ուժ, որը պետք է աջակցի տեղական ոստիկանությանը։ Սակայն փորձագետները զգուշացնում են, որ հնարավոր գործողությունների ընթացքում երեխաները կարող են հայտնվել առաջնագծում, իսկ նրանց հետ վարվելու հարցը շարունակում է մտահոգիչ մնալ։ ՄԱԿ-ը կոչ է անում կիրառել հատուկ «հանձնման մեխանիզմներ», որպեսզի երեխաները չդառնան բռնության զոհ և հնարավորություն ստանան վերաինտեգրվելու հասարակություն։