Տանը ոչ թե հյուրեր, այլ… երեք արջուկ․ արտասովոր դեպք

Եկատերինբուրգում կենդանիների փրկության կենտրոնի հիմնադիր Կիրիլ Պոտապովի մոտ անսպասելի «ընտանեկան համալրում» է գրանցվել․ նրա դարպասների մոտ թողել են երեք փոքրիկ արջուկ։ Այս մասին հայտնում է E1.RU-ն։

Պոտապովի խոսքով՝ երեկոյան ինչ-որ մեքենա ազդանշան է տվել, իսկ երբ նա դուրս է եկել՝ մեքենան արագ հեռացել է։ Մուտքի մոտ մնացել է մանկասայլակ, որի մեջ էլ եղել են արջուկները։ Կենդանիներին անմիջապես զննել են մասնագետները, և պարզվել է, որ նրանց կյանքին վտանգ չի սպառնում։

Նորեկներին անվանել են Ֆլորա, Պոտապիչ կրտսեր և Ջեֆֆ։ Վերջինս ամենափոքրն է՝ մոտ 2.5 կգ քաշով։ Արջուկներն այժմ ապրում են տաք պայմաններում, իսկ ապագայում նրանց համար կառուցվում են հատուկ տարածքներ, որտեղ կկարողանան ապրել ավելի բնական միջավայրում։