Ալկոհոլը կարող է արագացնել ուղեղի աշխատանքի անկումը

Ալկոհոլի չարաշահումը կարող է կապված լինել ճանաչողական ֆունկցիաների վաղ անկման հետ՝ դեռ մինչև դեմենցիայի ախտանշանների ի հայտ գալը։ Այս մասին հայտնում է Alcohol: Clinical and Experimental Research-ում հրապարակված հետազոտությունը։

Գիտնականները ուսումնասիրել են մոտ 400 միջին և բարձր տարիքի անձանց՝ գնահատելով նրանց հիշողությունն ու մտածողությունը հատուկ թեստերով, ինչպես նաև վերլուծելով արյան նմուշները։ Պարզվել է, որ ալկոհոլի միջին և բարձր օգտագործում ունեցող մարդկանց մոտ ճանաչողական ցուցանիշները զգալիորեն ցածր են եղել՝ թե՛ մինչև 65 տարեկանների, թե՛ ավելի մեծ տարիքի խմբերում։

Բացի այդ, այդ մարդկանց մոտ բարձր են եղել նաև Ալցհեյմերի հիվանդության հետ կապված կենսաբանական նշանները։ Հետազոտության հեղինակները ընդգծում են, որ ալկոհոլի չարաշահումը կարող է լինել վերահսկելի ռիսկի գործոն, որի նվազեցումը կարող է օգնել պահպանել ուղեղի առողջությունը։