Մերձավոր Արևելքի ճգնաժամը՝ նոր դաշինքների սկիզբ․ Ռուսաստանը խորացնում է կապերը Իրանի հետ

Ռուսաստանը հնարավորություն է ստացել խորացնելու համագործակցությունը Իրանի հետ՝ Մերձավոր Արևելքում հակամարտության հարցում իր սկզբունքային դիրքորոշման շնորհիվ։ Այս մասին հայտարարել է Դմիտրի Տրենինը՝ Ռուսաստանի միջազգային հարաբերությունների խորհրդի նախագահը, որի վերլուծական հոդվածը հրապարակվել է նույն կազմակերպության կայքում։ Նրա խոսքով՝ ծանր փորձությունների միջով անցած Իրանը բարձրացրել է իր միջազգային դերակատարությունը։

Տրենինը նշում է, որ Ռուսաստանը, Չինաստանը, Իրանը, ինչպես նաև Բելառուսը և Հյուսիսային Կորեան ձևավորում են Եվրասիայում անվտանգության նոր համակարգի առանցքը։ Միևնույն ժամանակ, ըստ փորձագետի, Մոսկվային հաջողվել է պահպանել կապերը ԱՄՆ նախագահի Դոնալդ Թրամփի, Իսրայելի և Պարսից ծոցի երկրների հետ՝ շարունակելով բազմավեկտոր քաղաքականությունը նույնիսկ լարված իրավիճակում։

Վերլուծաբանի գնահատմամբ՝ հակամարտությունն արդեն մի շարք հետևանքներ է ունեցել Ռուսաստանի համար․ ԱՄՆ-ի հետաքրքրությունը Ուկրաինայի նկատմամբ նվազել է, սրվել են Վաշինգտոնի և ՆԱՏՕ-ի հարաբերությունները, իսկ նավթի գները ժամանակավորապես աճել են։ Միևնույն ժամանակ հաղորդվում է, որ Ռուսաստանի նախագահ Վլադիմիր Պուտինը և ԱՄՆ նախագահ Դոնալդ Թրամփը հեռախոսազրույց են ունեցել՝ քննարկելով Իրանի շուրջ զարգացումները և Ուկրաինայի հարցը, մինչդեռ ՌԴ ԱԳՆ ներկայացուցիչ Մարիա Զախարովան ընդգծել է, որ հակամարտությունը ռազմական լուծում չունի։