Հունաստանը արգելելու է սոցցանցերը մինչև 15 տարեկանների համար․ որոշումը կմտնի ուժի մեջ 2027-ից

Հունաստանը պատրաստվում է արգելել սոցիալական ցանցերի օգտագործումը մինչև 15 տարեկան երեխաների համար՝ սկսած 2027 թվականի հունվարի 1-ից։ Այս մասին հայտարարել է երկրի վարչապետ Կիրիակոս Միցոտակիսը՝ Reuters գործակալության փոխանցմամբ՝ նշելով, որ որոշման հիմքում ընկած են երեխաների մոտ աճող անհանգստությունը, քնի խանգարումները և սոցցանցերի կախվածություն առաջացնող մեխանիզմները։

Վարչապետը իր ուղերձում ընդգծել է, որ երեխաները չափազանց շատ ժամանակ են անցկացնում էկրանների առջև, ինչը խանգարում է նրանց մտավոր հանգստին և ավելացնում ճնշումը՝ պայմանավորված մշտական համեմատություններով և առցանց մեկնաբանություններով։ Նրա խոսքով՝ բազմաթիվ ծնողներ հայտնել են, որ իրենց երեխաները վատ են քնում, արագ են անհանգստանում և երկար ժամեր անցկացնում հեռախոսների վրա։

Հունաստանում անցկացված հարցման տվյալներով՝ բնակչության շուրջ 80 տոկոսը աջակցում է նման արգելքին։ Կառավարությունն արդեն արգելել է բջջային հեռախոսների օգտագործումը դպրոցներում և ներդրել ծնողական վերահսկողության գործիքներ։ Միցոտակիսը նշել է, որ Հունաստանը կարող է դառնալ առաջին երկրներից մեկը նման քայլով՝ միաժամանակ կոչ անելով Եվրամիությանը ևս գնալ այս ուղղությամբ, մինչդեռ Սլովենիան, Մեծ Բրիտանիան, Ավստրիան և Իսպանիան նույնպես քննարկում են նման սահմանափակումներ։