Ո՞վ հաղթեց․ Մեդվեդևն արձագանքել է ԱՄՆ-ի և Իրանի միջև հրադադարի հաստատմանը

Ռուսաստանի Անվտանգության խորհրդի փոխնախագահ Դմիտրի Մեդվեդևը իր Telegram ալիքում մեկնաբանել է ԱՄՆ-ի և Իրանի միջև հակամարտության ընթացքում հրադադարի ռեժիմը։

«ԱՄՆ-Իրան հակամարտությունը դադարեցված է։ Ինչպես և կանխատեսվում էր, երկու կողմերն էլ հաղթանակ հայտարարեցին։ Ուրեմն ո՞վ հաղթեց։ Առաջին հերթին՝ առողջ բանականությունը, որի հանդեպ հավատը լրջորեն խաթարվեց Սպիտակ տան հայտարարություններով՝ իրանական քաղաքակրթությունը մեկ օրում ոչնչացնելու մասին», - գրել է Մեդվեդևը։

Քաղաքական գործիչը նշել է, որ այն փաստը, որ ԱՄՆ նախագահ Դոնալդ Թրամփը համաձայնել է տասը կետանոց ծրագրին, հաջողություն է իրանցիների համար։ Մեդվեդևի խոսքով՝ միակ հարցն այն է, թե արդյոք Վաշինգտոնը կհամաձայնի դրան. չէ՞ որ ԱՄՆ-ի առջև դրված պահանջները ներառում են Իրանին հասցված վնասի փոխհատուցում, միջուկային ծրագրի շարունակություն և Թեհրանի վերահսկողություն Հորմուզի նեղուցի նկատմամբ, որը մեծ նշանակություն ունի Թրամփի համար։