Կադաստրի կոմիտեն առաջարկում է փոփոխություններ գույքի նկատմամբ իրավունքների և սահմանափակումների պետական գրանցման գործընթացում. «Փաստ»

«Փաստ» օրաթերթը գրում է.

Կադաստրի կոմիտեն առաջարկում է փոփոխություններ և լրացումներ կատարել կառավարության 2012 թվականի փետրվարի 9-ի N 165-Ն որոշման մեջ։ Նախագծով կարգավորման առարկա են գույքի նկատմամբ իրավունքների և սահմանափակումների պետական գրանցման դիմումների և փաստաթղթերի էլեկտրոնային եղանակով ներկայացման հետ կապված հարաբերությունները, որոնք կարգավորվում են կառավարության 2012 թվականի փետրվարի 9-ի N 165-Ն որոշման 1-ին կետով հաստատված հավելվածով սահմանված կարգով։ Նախագծով առաջարկվում է նշված կարգում կատարել մի շարք լրացումներ և փոփոխություններ՝ էլեկտրոնային եղանակով դիմումների և փաստաթղթերի ներկայացման ընթացակարգերը հստակեցնելու և կատարելագործելու, ինչպես նաև դրանց կիրառման ընթացքում ի հայտ եկած իրավական և գործնական խնդիրները կարգավորելու նպատակով։

Մասնավորապես, նախագծով հստակեցվում է, որ էլեկտրոնային եղանակով դիմումների ներկայացումն իրականացվում է դիմումատուի համաձայնությամբ։ Միաժամանակ վերանայվում և առավել հստակ կարգավորվում է իրավաբանական անձանց անունից դիմումների ներկայացման կարգը՝ սահմանելով համապատասխան լիազորություններով օժտված ֆիզիկական անձանց միջոցով հանդես գալու, ինչպես նաև լիազորագրերի ներկայացման և էլեկտրոնային թվային ստորագրությամբ հավաստման պահանջները։

Նախագծով առանձին կարգավորում է սահմանվում նաև այն դեպքերի համար, երբ պետական գրանցման ենթակա իրավունքները ծագում են բանկերի կամ հիփոթեքային վարկ տրամադրելու իրավասություն ունեցող վարկային կազմակերպությունների մասնակցությամբ կնքված խառը պայմանագրերից։ Այդ դեպքերում նախատեսվում է, որ համապատասխան դիմումները և կից փաստաթղթերը ներկայացնում են բացառապես համապատասխան բանկը կամ վարկային կազմակերպությունը, ինչը միտված է գործընթացի պատշաճ կազմակերպման և իրավական որոշակիության ապահովմանը։

Նախագծի ընդունմամբ ակնկալվում է հստակեցնել գույքի նկատմամբ իրավունքների և սահմանափակումների պետական գրանցման դիմումների ու փաստաթղթերի էլեկտրոնային եղանակով ներկայացման ընթացակարգերը, ապահովել իրավաբանական անձանց, ինչպես նաև բանկերի և հիփոթեքային վարկ տրամադրելու իրավասություն ունեցող վարկային կազմակերպությունների մասնակցությամբ ծագող հարաբերությունների շրջանակում կարգավորումների միատեսակ կիրառությունը, բարձրացնել ներկայացվող փաստաթղթերի և էլեկտրոնային թվային ստորագրությունների ստուգման արդյունավետությունը, ինչպես նաև նվազեցնել գործնական կիրառման ընթացքում առաջացող իրավական և տեխնիկական բնույթի խնդիրները։ Արդյունքում կբարձրանա պետական գրանցման էլեկտրոնային ծառայությունների մատուցման արդյունավետությունը, կապահովվի գործընթացի առավել հստակ, կանխատեսելի և պատշաճ կազմակերպված իրականացումը։