Հրազդանի կիրճը կստանա հատուկ պահպանվող տարածքի կարգավիճակ

Շրջակա միջավայրի նախարարությունը կարևորում է Հրազդանի կիրճի տարածքի պահպանությունը և կայուն կառավարումը՝ այն դիտարկելով որպես մայրաքաղաքի էկոլոգիական համակարգի առանցքային բաղադրիչներից մեկը։

 

Կառավարության համապատասխան որոշմամբ նախատեսվում է հատկացնել 172 մլն դրամ Երևանի քաղաքապետարանին՝ կիրճի տարածքում հանգստի գոտու ձևավորման և անհրաժեշտ ենթակառուցվածքների զարգացման նպատակով։ Ծրագիրը միտված է տարածքի էկոլոգիական և սոցիալական գործառույթների համադրմանը՝ ապահովելով բնակչության համար մատչելի, անվտանգ և բարեկարգ հանրային միջավայր։

Ծրագրի շրջանակում Արաբկիր վարչական շրջանի հատվածում նախատեսվում է իրականացնել լանդշաֆտային և ճարտարապետական համալիր լուծումներ՝ ներառյալ սպորտային և մշակութային ենթակառուցվածքների ստեղծում։ Միաժամանակ իրականացվել են տարածքի կենսաբազմազանության՝ ֆլորայի և ֆաունայի համապարփակ ուսումնասիրություններ, որոնք հիմք են հանդիսանում Հրազդանի կիրճին հատուկ պահպանվող տարածքի կարգավիճակ շնորհելու գործընթացի համար։

 

Նախաձեռնությունը համահունչ է քաղաքային կանաչ տարածքների ընդլայնման և էկոհամակարգերի վերականգնման պետական քաղաքականությանը՝ միաժամանակ ապահովելով բնական միջավայրի պահպանությունը և հանրային օգտագործման հնարավորությունների զարգացումը։

Շրջակա միջավայրի նախարարությունը շարունակելու է համագործակցել բոլոր շահագրգիռ կողմերի հետ՝ ապահովելու ծրագրի իրականացումը բնապահպանական բարձր չափանիշներին համապատասխան և երկարաժամկետ կայունության սկզբունքներով։