Պենտագոնը սպառնացել է Հռոմի պապին՝ Թրամփի հասցեին ուղղված նրա քննադատությունից հետո. The New Republic

ԱՄՆ-ի և կաթոլիկ եկեղեցու միջև հարաբերությունները փոխվել են հունվարից ի վեր, երբ ԱՄՆ պաշտպանության նախարարության բարձրաստիճան պաշտոնյաները կոշտ հայտարարություններ են փոխանակել Վատիկանի ներկայացուցչի հետ, գրում է The New Republic-ը։

Հռոմի Լևոն XIV պապի՝ աշխարհի դրության մասին ելույթից մի քանի օր անց պաշտպանության նախարարի քաղաքականության գծով տեղակալ Էլբրիջ Քոլբին Պենտագոնում փակ հանդիպման է հրավիրել Վատիկանի ներկայացուցիչ կարդինալ Քրիստոֆ Պիեռին՝ նրա գլխին դասախոսություն կարդալու համար, գրում է պարբերականը։

«Միացյալ Նահանգները,- հայտարարել է Քոլբին, ըստ The Free Press-ի սենսացիոն նոր հաղորդագրության,- ունի ռազմական ուժ, որը նրան հնարավորություն է ընձեռում անել աշխարհում խելքին փչածը։ Կաթոլիկ եկեղեցին ավելի լավ կանի՝ անցնի նրանց կողմը»։

Հանդիպմանը ներկա ամերիկացի պաշտոնյաներից մեկը խոսել է Ավինյոնի պապականության մասին՝ 14-րդ դարի այն ժամանակաշրջանի, երբ ֆրանսիական միապետությունը ենթարկվել է կաթոլիկ եկեղեցուն՝ հրամայելով հարձակում կատարել Հռոմի պապ Բոնիֆացիոս VIII-ի վրա, ինչը հանգեցրել է նրա անկմանը, ապա՝ մահվանը, և պապականությանը ստիպել է Հռոմից տեղափոխվել Ֆրանսիայի ներսում տարածաշրջան՝ Ավինյոն։

ԱՄՆ նախագահ Դոնալդ Թրամփի վարչակազմն առարկել է իր ռազմատենչ հակումներին առնչվող Հռոմի պապի քննադատությանը։

Պաշտպանության նախարար Փիթ Հեգսեթը և Պենտագոնի այլ բարձրաստիճան պաշտոնյաներ հատկապես վրդովված էին Հռոմի պապի հունվարի 9-ի ելույթի այն հատվածներից, որոնցում նա պնդում էր, որ «դիվանագիտությունը, որը խրախուսում է երկխոսությունը և ձգտում է բոլոր կողմերի միջև համաձայնության, փոխարինվում է ուժի վրա հիմնված դիվանագիտությամբ», և որ «պատերազմը կրկին նորաձև է, և պատերազմի ծարավը ավելի լայն տարածում է գտնում աշխարհում»։

Հռոմի պապի ելույթը տող առ տող վերլուծության է ենթարկվել և մեկնաբանվել է որպես վարչակազմի նկատմամբ թշնամական ուղերձ, ասվում է Հռոմի պապին նվիրված Letters from Leo բլոգի հեղինակ Քրիստոֆեր Հեյլի նամակում։