ԱՄՆ–Իրան հակամարտությունում արձանագրվել է «գնային ասիմետրիա»

ԱՄՆ-ի, Իսրայելի և Իրանի միջև ռազմական հակամարտությունը ձևավորել է այսպես կոչված «գնային ասիմետրիա», երբ տեխնոլոգիական առավելությունը վերածվում է տնտեսական բեռի։ Այս մասին «Известия»-ին հայտնել է ռազմական փորձագետ Դմիտրի Կորնևը։

Նրա խոսքով՝ հակաօդային պաշտպանության թանկարժեք հրթիռները, որոնց արժեքը հասնում է մոտ 3 միլիոն դոլարի, կիրառվում են զգալիորեն ավելի էժան՝ 20-50 հազար դոլար արժողությամբ դրոնների ոչնչացման համար։ Կորնևը նշում է, որ Իրանը կարողանում է արտադրել անօդաչու սարքեր՝ օգտագործելով մատչելի քաղաքացիական բաղադրիչներ, մինչդեռ ԱՄՆ-ի և Իսրայելի ռազմական տեխնիկան արտադրվում է սահմանափակ քանակներով և բարձր արժեքով, ինչը կարող է հանգեցնել զինամթերքի ավելի արագ սպառման։

Փորձագետի գնահատմամբ՝ հակամարտության ընթացքում ձևավորվել է նաև օդային տարածքի ազդեցության բաժանում․ «մեծ երկինքը» վերահսկվում է Վաշինգտոնի և Երուսաղեմի կողմից, իսկ «փոքր երկինքը»՝ Թեհրանի։ Բացի այդ, Իրանի դիրքերն ամրապնդվում են ստորգետնյա «հրթիռային քաղաքներով» և զանգվածային հարվածների մարտավարությամբ, մինչդեռ ԱՄՆ-ը նախատեսում է զգալիորեն ավելացնել նոր սերնդի հրթիռների գնումները՝ հավասարակշռությունը վերականգնելու նպատակով։