Գտնվել է արյան ճնշումը նվազեցնող բնական միջոց

Գիտնականները պարզել են, որ ճակնդեղի և գրեյպֆրուտի հյութերը կարող են նպաստել արյան ճնշման նվազեցմանը և բարելավել սրտանոթային համակարգի աշխատանքը։ Հետազոտության արդյունքները հրապարակվել են Journal of Human Nutrition and Dietetics-ում։

Փորձին մասնակցել են 15 մեծահասակներ՝ բարձր ճնշմամբ։ Նրանք տարբեր օրերին օգտագործել են ճակնդեղի հյութ, գրեյպֆրուտի հյութ և դրանց համադրությունը, որից հետո գիտնականները շուրջ 4,5 ժամ հետևել են նրանց արյան ճնշմանը, սրտի զարկերի հաճախականությանը և սրտի ռիթմի փոփոխականությանը։

Արդյունքները ցույց են տվել, որ հյութերի ընդունումից հետո նվազել են ինչպես սիստոլիկ, այնպես էլ դիաստոլիկ ճնշման ցուցանիշները։ Գիտնականները դա կապում են ճակնդեղում պարունակվող նիտրատների և գրեյպֆրուտում առկա պոլիֆենոլների հետ, որոնք ազդում են անոթների տոնուսի և արյան շրջանառության վրա։ Միաժամանակ նշվում է, որ էֆեկտը կարող է լինել կարճաժամկետ և պահանջում է լրացուցիչ ուսումնասիրություններ։