Al Jazeera․ Հորմուզի նեղուցի շուրջ անհրաժեշտ է տարածաշրջանային համաձայնություն

Հորմուզի նեղուցում լարված իրավիճակը ցույց է տալիս, որ անհրաժեշտ է կայուն և երկարաժամկետ կարգավորում՝ հիմնված միջազգային իրավունքի վրա։ Այս մասին գրում է Al Jazeera-ը՝ ներկայացնելով փորձագետ Ռուդի Բարուդիի վերլուծությունը։

Նյութում նշվում է, որ Դոնալդ Թրամփի հայտարարած հրադադարից հետո Իրանը համաձայնել է վերաբացել նեղուցը առևտրային նավերի համար՝ պայմանով, որ դրանք կհամակարգեն շարժը իր իշխանությունների հետ։ Սակայն վերջին զարգացումները ցույց են տվել, որ նեղուցի փակումը կարող է լուրջ հարված հասցնել համաշխարհային տնտեսությանը՝ ազդելով նավթի մատակարարումների և գների վրա։

Հոդվածում ընդգծվում է, որ միջազգային իրավական մեխանիզմները, այդ թվում՝ ՄԱԿ-ի ծովային իրավունքի կոնվենցիան, ապահովում են ազատ նավարկության սկզբունքը և չեն թույլ տալիս որևէ երկրի միակողմանի սահմանափակումներ։ Փորձագետը կոչ է անում տարածաշրջանային երկրներին և միջազգային կառույցներին՝ սկսել ակտիվ բանակցություններ և ստեղծել համատեղ կառավարման համակարգ՝ ապահովելու Հորմուզի նեղուցով անվտանգ և անխափան անցումը