Էստոնիայի մասնակցությամբ Երևանում մեկնարկել է արտահանման զարգացման նոր նախաձեռնություն

ՀՀ էկոնոմիկայի նախարարի տեղակալ Անուշիկ Ավետյանը մասնակցել է Արտահանման դյուրացման ծրագրի պաշտոնական բացմանը և հանդես եկել ողջույնի խոսքով։ Միջոցառմանը բացման խոսքով է հանդես եկել նաև Էստոնիայի արտաքին գործերի նախարար Մարգուս Ցահքնան։ 

Անուշիկ Ավետյանը կարևորել է Հայաստանի և Էստոնիայի միջև գործակցության շարունակական զարգացումը՝ այն բնորոշելով որպես փոխադարձ վստահության, բարեփոխումների նկատմամբ համատեղ հանձնառության և մրցունակության ու նորարարության վրա հիմնված գործընկերություն։ Նա նաև ողջունել է Հայաստանում Էստոնիայի դեսպանության բացումը՝ վստահություն հայտնելով, որ այն նոր խթան կհաղորդի երկկողմ հարաբերություններին և կնպաստի նոր հնարավորությունների բացահայտմանը՝ հատկապես թվային պետական ծառայությունների և տվյալների կառավարման, կիբերանվտանգության, բարձր տեխնոլոգիական և նորարարական ոլորտներում գործակցության, ինչպես նաև արտահանման զարգացման և շուկաների դիվերսիֆիկացման ուղղություններով։ 

Նախարարի տեղակալը ընդգծել է, որ Հայաստանի համար արտահանման խթանումը ոչ միայն տնտեսական առաջնահերթություն է, այլև գլոբալ շուկաներում դիրքավորման և տնտեսական դիմակայունության ապահովման հիմնարար գործոն, որը խթանում է ընկերությունների զարգացումը, նորարարությունը, նոր բիզնես մոդելների կիրառումը և արտահանման շուկաների ընդլայնումը։ Այս համատեքստում նա բարձր է գնահատել էստոնացի գործընկերների, «Visionest Institute»-ի և ծրագրի իրականացմանը նպաստող զարգացման գործընկերների ներդրումը՝ նշելով, որ նման նախաձեռնությունները գործնական հնարավորություն են ստեղծում հայկական բիզնեսի համար։ 

Միջոցառման շրջանակում Անուշիկ Ավետյանը մասնակցել է նաև պանելային քննարկմանը, որի ընթացքում անդրադարձել է հայկական արտահանողների աջակցության գործնական մեխանիզմներին, միջազգային չափանիշներին համապատասխանության ամրապնդման, սերտիֆիկացման, թվային կարողությունների զարգացման, ինչպես նաև B2B կապերի և արտաքին շուկաներ մուտքի խթանման հարցերին։ Նա ընդգծել է, որ զարգացման գործընկերների աջակցությունն առավել արդյունավետ է այն դեպքում, երբ այն համահունչ է Հայաստանի ազգային առաջնահերթություններին, ունի գործնական ուղղվածություն և ապահովում է չափելի արդյունքներ բիզնեսի համար։