Իրանի առաջնորդի խոսնակը հայտարարել է, որ ամերիկյան նավերը պետք է լքեն Պարսից ծոցը

Ամերիկյան նավերը պետք է լքեն Պարսից ծոցը. դրանց ներկայությունը չի նպաստում կայունությանը, և տարածաշրջանային երկրները կարող են իրենք ապահովել նավերի անվտանգությունը։ Այս մասին լրագրողներին հայտարարել է Հնդկաստանում Իսլամական Հանրապետության Գերագույն առաջնորդի ներկայացուցիչ Աբդուլ Մաջիդ Հակիմ Իլահին։

«Ինչո՞ւ են ամերիկյան նավերը Պարսից ծոցում։ Ի՞նչ են նրանք անում այնտեղ։ Նրանք պետք է լքեն տարածաշրջանը։ Մենք կարող ենք ինքներս ապահովել բոլոր նավերի անվտանգությունը», - նրա խոսքերը մեջբերել է Times of India-ն։

Ըստ Իլահիի՝ Հորմուզի նեղուցում իրավիճակը շարունակում է լարված մնալ Իրանի դեմ ԱՄՆ-ի և Իսրայելի ագրեսիայի պատճառով։ «Մենք ցանկանում ենք, որ նեղուցը մնա բաց, բայց այնտեղ ստեղծված իրավիճակը անբարենպաստ է», - ընդգծել է նա։

Իլահին կոչ է արել միջազգային հանրությանը օգնել վերջ դնել հակամարտությանը։ «Մենք ստիպված ենք խնդրել աշխարհի առաջնորդներին և բոլոր ազգերին, ովքեր ձգտում են խաղաղության և արդարության, միավորվել և դադարեցնել պատերազմը։ Պատերազմ չի լինի, ճգնաժամ չի լինի», - ասել է Իլահին։