Ավստրալիան հրաժարվել է մասնակցել Հորմուզի նեղուցի շրջափակմանը

Ավստրալիան չի քննարկում Հորմուզի նեղուցի՝ ԱՄՆ-ի կողմից ռազմածովային շրջափակմանը մասնակցելու հարցը։ Այս մասին հայտարարել է Ավստրալիայի փոխարտգործնախարար Մեթ Թիսթլթվեյթը Sky News Australia-ին տված հարցազրույցում։

Դիվանագետի խոսքով՝ Կանբերրան կարծում է, որ «երկարատև խաղաղության հասնելու և, ի վերջո, ավստրալացիների համար բենզինի գների իջեցման լավագույն միջոցը բանակցային կարգավորումն է»։

Ապրիլի 12-ին ԱՄՆ նախագահ Դոնալդ Թրամփը հայտարարեց, որ Միացյալ Նահանգները կսկսի Հորմուզի նեղուցի շրջափակումը՝ Իրանի հետ հիմնական համաձայնագրերի խզումից հետո։ Նախագահը հանձնարարել է ԱՄՆ ռազմածովային ուժերին հետևել և կալանավորել միջազգային ջրերում գտնվող նավերը, եթե նրանք մաքսատուրքեր են վճարում Իրանին, և ոչնչացնել տարածքում գտնվող ականները։

ԱՄՆ առաջնորդը նաև նշել է, որ նեղուցով ազատ անցումը անհնար է եղել Թեհրանի դիրքորոշման պատճառով։