Համբարձում Մաթևոսյանը հանդիպել է Անդրեաս Էրիկսենի հետ․ քննարկվել են շրջակա միջավայրի պահպանության և բնական աղետների կառավարման հարցեր

ՀՀ Շրջակա միջավայրի նախարար Համբարձում Մաթևոսյանը Օսլոյում երկկողմ հանդիպում է ունեցել Նորվեգիայի Թագավորության կլիմայի և շրջակա միջավայրի նախարար Անդրեաս Բյելանդ Էրիկսենի հետ։ Հանդիպման ընթացքում քննարկվել են շրջակա միջավայրի պահպանության ոլորտի առաջնահերթ խնդիրներն ու դրանց լուծման հնարավորությունները՝ անդրադարձ կատարելով նաև Նորվեգիայի փորձին բնական աղետների, մասնավորապես՝ ջրհեղեղների կառավարման և կանխարգելման ուղղությամբ։

Կողմերը քննարկել են նաև COP17 համաժողովի նախապատրաստական աշխատանքները, ակնկալիքներն ու նախորդ համաժողովների փորձը՝ կարևորելով առաջնորդների մակարդակում բարձրացվելիք առաջնահերթությունների հստակեցումը։ Անդրադարձ է կատարվել Գլոբալ վերանայման գործընթացին և առաջնորդների գագաթնաժողովի դերին՝ COP17-ի օրակարգի ձևավորման համատեքստում։ Նախարարը հատուկ ընդգծել է ներառականության ապահովման կարևորությունը՝ կարևորելով բոլոր շահագրգիռ կողմերի, այդ թվում՝ խոցելի խմբերի, բնիկ ժողովուրդների, կանանց և երիտասարդների մասնակցությունը։

Հանդիպման ընթացքում քննարկվել են նաև մեկանգամյա օգտագործման պլաստիկի սահմանափակման քաղաքականությանը, թվայնացման գործիքների կիրառմանը, ինչպես նաև Փարիզյան համաձայնագրի 6.2 հոդվածի շրջանակում միջազգային ածխածնային շուկաների համագործակցության հնարավորությունները։ Նորվեգական կողմը ներկայացրել է NOGER նախաձեռնությունը՝ որպես կառավարություն-կառավարություն համագործակցության մեխանիզմ։

Համբարձում Մաթևոսյանը ողջունել է Նորվեգիայի առաջնորդող դերակատարումը և ընդգծել Հայաստան–Նորվեգիա համագործակցության զարգացման կարևորությունը՝ հատկապես NOGER նախաձեռնության շրջանակում։ Նա նշել է, որ համագործակցությունը կարող է սկսվել տեխնիկական պատրաստվածության բարձրացման փուլից և հետագայում ընդլայնվել դեպի փորձնական ծրագրեր, մասնավորապես արդյունաբերության ոլորտում։

Նախարարը հավելել է, որ նման համագործակցությունը կնպաստի Հայաստանի ազգային մակարդակով սահմանված գործողությունների իրականացմանը, կուժեղացնի ինստիտուցիոնալ կարողությունները և կբացի նոր հնարավորություններ կլիմայական ֆինանսավորման ներգրավման համար։ Նորվեգական կողմը պատրաստակամություն է հայտնել աջակցել Հայաստանին միջազգային բանակցային գործընթացներում։

Կողմերը անդրադարձել են նաև Հայաստանի, Կոլումբիայի նախագահության և Կենսաբազմազանության մասին կոնվենցիայի քարտուղարության միջև համագործակցության զարգացման հեռանկարներին։