Վենս. ԱՄՆ-ը պահանջում է, որ Իրանը հրաժարվի ուրանի հարստացումից

ԱՄՆ փոխնախագահ Ջ.Դ. Վենսը հայտարարել է, որ ԱՄՆ իշխանությունները պահանջում են, որ Իրանը հրաժարվի ուրանը հարստացնելու իր կարողությունից։

«Մեկ բան է, որ իրանցիներն ասեն, որ մտադիր չեն ունենալ միջուկային զենք։ Մեկ այլ բան է, որ մենք ստեղծենք մեխանիզմ, որը կապահովի, որ դա տեղի չունենա։ Անշուշտ, դրա մի մասն է ապահովել, որ նրանք չունենան ուրան հարստացնելու հնարավորություն», - ասել է նա Fox News-ի ուղիղ եթերում։

Վենսը նշել է, որ Միացյալ Նահանգները պատրաստ է զիջումների գնալ որոշ հարցերում, բայց Վաշինգտոնը «որևէ ճկունություն» չի ցուցաբերի Իրանի տարածքում հարստացված միջուկային վառելիքի պահեստավորման կամ Թեհրանի կողմից ուրանի հարստացման հարցում։

«Այդ երկու ճակատներում, անկեղծ ասած, իրանցիները որոշակի առաջընթաց են ցույց տվել։ Նրանք շարժվել են մեր ուղղությամբ, այդ իսկ պատճառով կարծում եմ, որ կարող ենք ասել, որ տեսել ենք լավ նշաններ, բայց նրանք բավարար առաջընթաց չեն գրանցել», - հավելել է նա։