Համբարձում Մաթևոսյանը Նորվեգիայում ծանոթացել է խոնավ տարածքների պահպանության և էկոհամակարգերի կառավարման նորվեգական փորձին

 

Այցի շրջանակում նախարար Համբարձում Մաթևոսյանը մասնակցել է Նորդրե Էյերեն արգելոց և Ռամսարի տարածք իրականացված դաշտային ծրագրին, որը հնարավորություն տվեց տեղում ծանոթանալու խոնավ տարածքների պահպանության և էկոհամակարգերի կառավարման նորվեգական լավագույն փորձին։

Ծրագիրը ներառում էր նախապատրաստական քննարկումներ, որին հաջորդեց նավարկություն արգելոցի տարածքում։

 

Այդ ընթացքում նախարարն անմիջականորեն դիտարկել է խոնավ տարածքների կառավարման գործնական մոտեցումները՝ հատկապես համալիր պահպանության մեթոդների, հանրային իրազեկման ռազմավարությունների և տեղական համայնքների ակտիվ ներգրավման տեսանկյունից։

Ներկայացվեցին կառավարման գործառնական մոդելները, տեղում իրականացվող աշխատանքները և մոնիթորինգի համակարգերը։

Այցը կարևոր հնարավորություն էր՝ խորացնելու մասնագիտական գիտելիքները և առավել ամբողջական պատկերացում կազմելու, թե ինչպես է Նորվեգիան համադրում բնապահպանական առաջնահերթությունները կայուն օգտագործման սկզբունքների հետ՝ ապահովելով խոնավ տարածքների արդյունավետ կառավարումն ու կենսաբազմազանության պահպանումը։