Ախուրյան գետի և «Աջափնյա» ջրանցքի խնդիրը ՋԿ նախագահի ուշադրության կենտրոնում

Ջրային կոմիտեի (ՋԿ) նախագահ Արամազդ Ղալամքարյանը տեղակալ Կարեն Դաղբաշյանի և կոմիտեի ոլորտային ստորաբաժանումների ղեկավարների հետ աշխատանքային այց է կատարել Շիրակի մարզ։

 

Մինչեւ Գյումրի հասնելը՝ ՋԿ նախագահը հյուրընկալվել է Մարալիկ քաղաքում, որտեղ հանդիպել է Անի խոշորացված համայնքի ղեկավար Արման Սարիբեկյանի հետ։

 

Կողմերը քննարկել են ինչպես խմելու, այնպես էլ ոռոգման ջրի մատակարարման հետ կապված եւ հրատապ լուծում պահանջող խնդիրներ, մասնավորապես՝ նոր ջրատարերի կառուցման եւ առկա ենթակառուցվածքների նորոգման հարցեր։

 

Կոմիտեի նախագահը խոստացել է լինել հետեւողական եւ փորձել գտնել ֆինանսավորման աղբյուրներ՝ բարձրացված խնդիրների հասցեագրման նպատակով։

 

Անի խոշորացված համայնքի ղեկավարի հետ Ղալամքարյանն այցելել է Սառնաղբյուրի ջրամբար, տեղում քննարկել ջրամբարում առկա ֆիլտրացիայի խնդիրը։

 

Այնուհետեւ այց է կատարվել համայնքի տարածքում առկա խմելու ջրի աղբյուրներ, որտեղ ՋԿ նախագահին ներկայացվել է առաջարկ՝ մոտակա բնակավայրերը խմելու ջրով ապահովելու հնարավոր գործողությունների մասին։

 

Մարզկենտրոն Գյումրիում Ջրային կոմիտեի նախագահը հանդիպում է ունեցել Շիրակի մարզպետ Դավիթ Առուշանյանի եւ մարզպետի տեղակալ Ալբերտ Այվազյանի հետ։ Քննարկվել են մարզում առկա՝ հրատապ լուծում պահանջող խնդիրները։

 

Առանձին անդրադարձ է կատարվել Ախուրյան գետի «Աջափնյա» ջրանցքի շուրջ տարիներ շարունակ ձգվող խնդրին. իրավական թնջուկը կապված է ջրանցքի օտարման և այն «Ջրաձոր ՀԷԿ»-ին շահագործման տրամադրման հետ:

 

 Կողմերը հանդիպել են Ախուրյան գետի վրա ՀԷԿ շահագործող «Լայթեքո» ընկերության ներկայացուցիչների հետ, համատեղ շրջայց կատարել Ախուրյան գետի և «Աջափնյա» ջրանցքի տարածքում:

 

 Ջրային կոմիտեի նախագահը նշել է, որ կարվի առավելագույնը՝ խնդիրը լուծելու և Ախուրյան գետը բնականոն հուն վերադարձնելու համար։