Համբարձում Մաթևոսյանը Նորվեգիայում մասնակցել է Ֆրիտյոֆ Նանսենի ինստիտուտի մասնագիտական ծրագրին

ՀՀ Շրջակա միջավայրի նախարար Համբարձում Մաթևոսյանը Օսլոյում գտնվող Ֆրիտյոֆ Նանսենի ինստիտուտում (Fridtjof Nansen Institute, FNI) շարունակում է մասնակցել բարձր մակարդակի մասնագիտական ծրագրին, որը կենտրոնացած է կենսաբազմազանության գլոբալ կառավարման, կլիմայական քաղաքականությունների և միջազգային բնապահպանական բանակցությունների արդի մարտահրավերների վրա։

Օրվա քննարկումները կառուցված էին գիտելիքի խորացման և միջազգային փորձի ուսումնասիրման շուրջ՝ հնարավորություն ընձեռելով ծանոթանալու տարբեր երկրների հաջողված մոտեցումներին և կիրառվող քաղաքական գործիքներին։

Մասնավորապես՝ ներկայացվեց Ֆրանսիայի կողմից COP21 համաժողովի կազմակերպման փորձը՝ որպես բազմակողմ կլիմայական բանակցություններում արդյունավետ ռազմավարական առաջնորդության օրինակ։ Քննարկվեցին նաև բնիկ ժողովուրդների դերի ընդլայնումը միջազգային գործընթացներում, SB8j հարթակում աշխարհաքաղաքական զարգացումները, ինչպես նաև կենսաբազմազանության բանակցություններում ավանդական գիտելիքի և ներկայացվածության կարևորությունը։

Առանձին ուշադրություն է դարձվել կենսաբազմազանության ֆինանսավորման մեխանիզմներին, Թվային հաջորդական տեղեկատվությանը (DSI), Նագոյայի արձանագրության կիրառման գործնական ասպեկտներին, ինչպես նաև Բույսերի գենետիկական ռեսուրսների միջազգային պայմանագրին՝ որպես սերմերի բազմազանության պահպանման կարևոր գործիք։

Ներկայացվել է նաև Ֆրիտյոֆ Նանսենի ինստիտուտի՝ Հայաստանի հետ համատեղ իրականացվող նախագիծը՝ ընդգծելով միջազգային համագործակցության և գիտելիքների փոխանակման կարևորությունը։

Անդրադարձ է կատարվել նաև պահպանվող տարածքներում կենսաբազմազանության և համայնքների կենսամիջոցների պահպանման կառավարման մոտեցումներին՝ կլիմայի փոփոխության և աճող զբոսաշրջության պայմաններում։

Օրվա ավարտին իրականացվել է շրջայց ինստիտուտում՝ ծանոթանալով նրա գործունեությանն ու պատմությանը։ Այցելվել է նաև Ֆրիտյոֆ Նանսենի հիշատակին նվիրված հուշակոթող, որտեղ ծաղիկներ է խոնարհել՝ հարգանքի տուրք մատուցելով մեծ մարդասերի հիշատակին։