Ռուսաստանը զանգվածային հարված է հասցրել Ուկրաինային․ թիրախում՝ ռազմարդյունաբերական օբյեկտներ

Ռուսաստանի պաշտպանության նախարարությունը հայտարարել է, որ երկրի զինված ուժերը զանգվածային «վրեժի հարված» են հասցրել Ուկրաինայի տարածքին։ Ըստ պաշտոնական հաղորդագրության՝ կիրառվել է բարձր ճշգրտության հեռահար զինատեսակներ՝ ցամաքային, օդային և ծովային հարթակներից, ինչպես նաև հարվածային անօդաչու թռչող սարքեր։

Նշվում է, որ հարվածների հիմնական թիրախը եղել են Ուկրաինայի ռազմարդյունաբերական համալիրի օբյեկտները, որտեղ արտադրվել են թևավոր հրթիռներ և տարբեր հեռահարության անօդաչու սարքեր։ Բացի այդ, խոցվել են նաև վառելիքաէներգետիկ ենթակառուցվածքներ, որոնք, ռուսական կողմի պնդմամբ, օգտագործվում էին ուկրաինական բանակի կարիքների համար։

Միևնույն ժամանակ, Ռուսաստանի պաշտպանության նախարարությունը հայտնում է, որ ապրիլի 16-ի գիշերը երկրի տարբեր շրջանների վրա խոցվել է ավելի քան 200 ուկրաինական անօդաչու սարք։ Հարվածների փորձերը գրանցվել են յոթ տարածաշրջաններում, այդ թվում՝ Օրյոլի և Սմոլենսկի մարզերում, ինչպես նաև Կրասնոդարի երկրամասում և Ղրիմում։