Պեսկովը մեկնաբանել է Վիկտորիա Բոնյայի դիմումը Պուտինին

Ռուսաստանի նախագահի մամուլի քարտուղար Դմիտրի Պեսկովը մեկնաբանել է բլոգեր Վիկտորիա Բոնյայի դիմումը նախագահ Վլադիմիր Պուտինին։ Ինչպես փոխանցում է РИА Новости-ն, Կրեմլում հաստատել են, որ տեսել են տեսանյութը, և այն իսկապես լայն արձագանք է ստացել։

Պեսկովի խոսքով՝ Բոնյայի հրապարակումը ուշադրություն է գրավել և դարձել է քննարկման առարկա՝ բարձրացված թեմաների պատճառով։ Նա նշել է, որ բլոգերը տեսանյութում անդրադարձել է բավականին ռեզոնանսային հարցերի, որոնք հանրային հետաքրքրություն են առաջացրել։

Միևնույն ժամանակ, նախագահի խոսնակը ընդգծել է, որ այդ խնդիրների ուղղությամբ արդեն իրականացվում է լայնածավալ աշխատանք՝ ներգրավված բազմաթիվ մասնագետներով։ Հիշեցնենք, որ ապրիլի 14-ին Բոնյան հրապարակել էր 18 րոպեանոց տեսանյութ, որտեղ առաջարկել էր ստեղծել հարթակ, որը հնարավորություն կտա Ռուսաստանի քաղաքացիներին անմիջապես կապ հաստատել երկրի նախագահի հետ։