ՆԳ նախարարության և ոստիկանության մի շարք ծառայողներ պարգևատրվել են

Ոստիկանության 108-րդ տարեդարձի առթիվ Պարեկային ծառայության վարչական համալիրում տեղի է ունեցել պարգևատրման արարողություն։

Ներկա էին Պարեկային ծառայության պետ Գևորգ Զաքարյանը, Համայնքային ոստիկանության գլխավոր վարչության պետի պարտականությունները կատարող Կարեն Խաչատրյանը, ՆԳ նախարարության և ոստիկանության այլ ներկայացուցիչներ։

 

«Ռազմավարությունների ազգային կենտրոն» հիմնադրամի Ոստիկանության քաղաքացիական վերահսկողության կենտրոնի և ՆԳ նախարարության համագործակցության շրջանակում կազմակերպված միջոցառման ընթացքում ծառայողական պարտականությունները բարեխղճորեն կատարելու համար Ոստիկանության երեք տասնյակից ավելի ծառայողներ արժանացել են շնորհակալագրերի։

 

Մասնագիտական և ծառայողական պրոֆեսիոնալիզմի, քաղաքացիական հասարակության հետ ակտիվ համագործակցության համար հիմնադրամի «Փյունիկի աստղ» մեդալով պարգևատրվել են ՆԳՆ բարեվարքության հարցերով կազմակերպիչ Անահիտ Կարապետյանը, Պարեկային ծառայության պետ Գևորգ Զաքարյանը, Քրեական ոստիկանության գլխավոր վարչության օպերատիվ տեղեկատվության ապահովման վարչության պետ Արմեն Աբրահամյանը և Արարատի գումարտակի պարեկ Մուշեղ Վարդանյանը։

 

Հիմնադրամի գործադիր տնօրեն Մկրտիչ Ավետիսյանը շնորհավորելով պարգևատրվածներին, ընդգծել է համակարգի արդիականացման, հանրային վստահության ամրապնդման կարևորությունը։

 

ՆԳ նախարարության և ոստիկանության գործընկերները կարևորել են ձևավորված համագործակցությունը, հատկապես կրթական և վերապատրաստման ծրագրերի իրականացման համատեքստում: