Մեղուն խափանել է Austrian Airlines-ի թռիչքը՝ 100-ից ավելի ուղևորներով

Ավստրիայում Austrian Airlines ավիաընկերության ինքնաթիռի թռիչքը հետաձգվել է անսպասելի պատճառով․ մեղուն հայտնվել է օդանավի համակարգում և խափանել թռիչքը։ Այս մասին հայտնում է Shot Telegram-ալիքը՝ նշելով, որ օդանավում եղել է ավելի քան 100 մարդ։

Դեպքը տեղի է ունեցել Ինսբրուկից Վիեննա իրականացվող չվերթի ժամանակ։ Թռիչքից առաջ օդաչուները նկատել են, որ սարքերի ցուցմունքները չեն համընկնում, ինչի հետևանքով որոշել են վերադառնալ տերմինալ։ Ուղևորներին իջեցրել են, իսկ մասնագետները սկսել են որոնել խափանման պատճառը։

Պարզվել է, որ մեղուն ներթափանցել է օդանավի քթի հատվածում գտնվող արագության չափման սարքի՝ Պիտոյի խողովակի մեջ։ Ինքնաթիռում գտնվել է 107 մարդ, որոնցից 102-ը՝ ուղևորներ։ Արդյունքում նրանք իրենց նպատակակետ են մեկնել պահուստային ինքնաթիռով՝ մոտ հինգ ժամ ուշացումով։