Reuters. Նավերը փորձում են անցնել Հորմուզի նեղուցով, սակայն անվտանգությունը դեռ հարցականի տակ է

Հորմուզի նեղուցի վերաբացման հայտարարությունից հետո մի շարք նավեր փորձել են դուրս գալ Պարսից ծոցից, սակայն նրանցից շատերը կանգ են առել կամ հետ են վերադարձել։ Ինչպես հայտնում է Reuters-ը՝ հղում անելով նավերի շարժին հետևող տվյալներին, մոտ 20 նավ շարժվել է դեպի նեղուց, սակայն մեծ մասը չի շարունակել երթուղին։

Իրանը հայտարարել է, որ նեղուցը բաց է առևտրային նավերի համար՝ Լիբանանի և Իսրայելի միջև հաստատված 10-օրյա հրադադարի ընթացքում։ Սակայն բեռնափոխադրող ընկերությունները զգուշությամբ են մոտենում այս հայտարարությանը՝ պահանջելով լրացուցիչ հստակեցումներ անվտանգության հարցերի շուրջ, մասնավորապես՝ ծովային ականների հնարավոր առկայության պատճառով։

Միջազգային կառույցներն ու ընկերությունները շարունակում են գնահատել իրավիճակը։ ՄԱԿ-ի ծովային կազմակերպությունը ուսումնասիրում է նավագնացության անվտանգության պայմանները, մինչդեռ խոշոր փոխադրողները հայտարարում են, որ պատրաստ են վերականգնել երթուղիները միայն ռիսկերի հստակ նվազման դեպքում։ Մինչ այդ, որոշ տանկերներ արդեն կրկին շարժվում են դեպի նեղուց՝ փորձելով ստուգել նոր պայմանները։