Հնդկաստանը հրաժարվել է Aadhaar հավելվածը պարտադիր տեղադրելու ծրագրից՝ տեխնոհսկաների դիմադրությունից հետո

Հնդկաստանի կառավարությունը հրաժարվել է սմարթֆոնների վրա ազգային նույնականացման Aadhaar հավելվածը պարտադիր նախապես տեղադրելու նախաձեռնությունից։ Ինչպես հայտնում է Reuters-ը, որոշումը ընդունվել է ոլորտի խոշոր ընկերությունների՝ Apple-ի, Samsung-ի և այլ արտադրողների հակազդեցությունից հետո։

Aadhaar-ը 12 նիշանոց կենսաչափական նույնականացման համակարգ է, որը օգտագործվում է բանկային, հեռահաղորդակցական և այլ ծառայություններում և ընդգրկում է շուրջ 1.3 միլիարդ բնակիչ։ Սակայն սմարթֆոն արտադրողները բարձրաձայնել էին անվտանգության, համատեղելիության և արտադրական ծախսերի ավելացման հետ կապված խնդիրներ, ինչի արդյունքում կառավարությունը վերանայել է իր մոտեցումը և հրաժարվել պարտադիր տեղադրման պահանջից։

Որոշումը ողջունել են նաև թվային իրավունքների պաշտպանները, որոնք նախկինում քննադատել էին համակարգը տվյալների արտահոսքերի և գաղտնիության ռիսկերի համար։ Փորձագետների կարծիքով՝ այս քայլը ցույց է տալիս, որ Նյու Դելին փորձում է հավասարակշռել իր թվային ռազմավարությունը և տեխնոլոգիական ընկերությունների հետ համագործակցությունը՝ խուսափելով չափազանց խիստ կարգավորումներից։