Ներդրվում է շրջակա միջավայրի վրա ազդեցության գնահատման պարզեցված մեխանիզմ

Կառավարությունը հավանություն է տվել «Շրջակա միջավայրի վրա ազդեցության գնահատման և փորձաքննության մասին» և «Պետական տուրքի մասին» օրենքներում փոփոխությունների և լրացումների նախագծերի փաթեթին։

 

Առաջարկվող փոփոխությունները միտված են խթանելու Հայաստանում անտառտնկման և անտառվերականգնման ծրագրերը, ինչպես նաև էականորեն պարզեցնելու կրթական ենթակառուցվածքների՝ դպրոցների և մանկապարտեզների կառուցման ու վերակառուցման գործընթացները։

Մասնավորապես՝ նախատեսվում է չեղարկել անտառապատման ծրագրերի համար սահմանված 300 հազար դրամ պետական տուրքը, ինչը կթեթևացնի ֆինանսական բեռը և կնպաստի լայնածավալ անտառտնկման նախաձեռնությունների իրականացմանը։

 

Միևնույն ժամանակ, պետական և համայնքային դպրոցների ու մանկապարտեզների նույն կամ հարակից տարածքում իրականացվող կառուցման և վերակառուցման նախագծերը չեն ենթարկվի ՇՄԱԳ փորձաքննության․ շրջակա միջավայրի վրա ազդեցության վերաբերյալ դիրքորոշումը կներկայացվի քաղաքաշինական փորձաքննության շրջանակում՝ ապահովելով ավելի արագ և արդյունավետ գործընթաց՝ պահպանելով բնապահպանական չափանիշները։

Փոփոխություններով նաև ներպետական օրենսդրությունը համապատասխանեցվում է Հայաստանի կողմից վավերացված Օրհուսի և Էսպո կոնվենցիաների պահանջներին, իսկ ռազմավարական էկոլոգիական գնահատման (ՌԷԳ) ընթացակարգերը դառնում են առավել նպատակային և ճկուն։

 

Այս քայլերով ներդրվում է պարզ, հստակ և արդյունավետ մեխանիզմ, որը միաժամանակ ապահովում է բնապահպանական պահանջների պահպանումը և զարգացման ծրագրերի արագ իրականացումը։