Սի Ցզինպինը կոչ է արել ապահովել ազատ նավարկությունը Հորմուզի նեղուցում

Չինաստանի ղեկավար Սի Ցզինպինը հեռախոսազրույցի ընթացքում Սաուդյան Արաբիայի գահաժառանգ Մուհամմեդ բեն Սալմանի հետ կոչ է արել ապահովել նավերի անխոչընդոտ անցումը Հորմուզի նեղուցով։ Այս մասին հաղորդում է «Սինհուա» գործակալությունը։

Չինաստանի առաջնորդը ընդգծել է, որ Պեկինը հանդես է գալիս անմիջական և համապարփակ հրադադարի օգտին՝ շեշտելով, որ Մերձավոր Արևելքում հակամարտությունները պետք է կարգավորվեն քաղաքական և դիվանագիտական միջոցներով։ Նրա խոսքով՝ նեղուցը պետք է մնա բաց միջազգային նավարկության համար՝ ապահովելով տարածաշրջանի և համաշխարհային տնտեսության շահերը։

Միաժամանակ Չինաստանը վերահաստատել է աջակցությունը տարածաշրջանի երկրներին՝ կայունության, անվտանգության և համագործակցության վրա հիմնված զարգացման ճանապարհին։ Ավելի վաղ Չինաստանի ԱԳՆ-ն մտահոգություն էր հայտնել ԱՄՆի կողմից իրանական առևտրային նավի առգրավման կապակցությամբ՝ կոչ անելով կողմերին գործել պատասխանատու և պահպանել ձեռք բերված պայմանավորվածությունները։