Նեթանյահուն դատապարտել է Լիբանանում Քրիստոսի արձանի վնասման դեպքը

Իսրայելի վարչապետ Բենիամին Նեթանյահուն հայտարարել է, որ խորապես ցնցված է Լիբանանի հարավում տեղի ունեցած միջադեպից, երբ Իսրայելի պաշտպանության բանակի զինծառայողը վնասել է Հիսուս Քրիստոսի արձանը։ Նրա մեկնաբանությունը հրապարակվել է X սոցիալական հարթակում։

Նեթանյահուն նշել է, որ խստորեն դատապարտում է տեղի ունեցածը՝ ընդգծելով, որ նման գործողությունները հակասում են երկրի արժեքներին։ Նա տեղեկացրել է, որ իսրայելական ռազմական կառույցները սկսել են հետաքննություն և մեղավորների նկատմամբ կկիրառվեն խիստ կարգապահական միջոցներ։

Վարչապետը նաև ընդգծել է, որ Իսրայելը Մերձավոր Արևելքում այն եզակի վայրերից է, որտեղ ապահովվում է կրոնական ազատությունը տարբեր հավատքի ներկայացուցիչների համար։ Ավելի վաղ հաղորդվել էր, որ զինծառայողը մուրճով կոտրել էր Հիսուս Քրիստոսի արձանը, իսկ բանակը խոստացել էր ոչ միայն պատժել մեղավորին, այլև աջակցել արձանի վերականգնմանը։