Ճապոնիայից հնարավոր ցունամին վտանգ չի ներկայացնում Ռուսաստանի համար

Ճապոնիայում տեղի ունեցած ուժեղ երկրաշարժից հետո առաջացած ցունամին լուրջ վտանգ չի ներկայացնում Ռուսաստանի համար։ Այս մասին հայտնում է NEWS.ru-ն՝ հղում անելով սեյսմոլոգ Պյոտր Շեբալինին։

Մասնագետի խոսքով՝ թեև ցունամիի ալիքները կարող են հասնել Ռուսաստանի ափերին, դրանց բարձրությունը կլինի աննշան՝ ընդամենը մի քանի սանտիմետր, ինչը չի կարող էական վնաս հասցնել։ Նա նաև նշել է, որ կարևոր է հաշվի առնել երկրաշարժի ճշգրիտ տեղակայումը։

Շեբալինը հավելել է, որ եթե երկրաշարժը գրանցվել է Խաղաղ օվկիանոսում, ապա ալիքները կարող են հասնել Կուրիլյան կղզիներին, սակայն նույնիսկ այդ դեպքում դրանք կմնան թույլ։ Ավելի վաղ հաղորդվել էր, որ ապրիլի 20-ին Ճապոնիայի Սանրիկու շրջանի մոտ գրանցվել է 7.4 մագնիտուդ ուժգնությամբ երկրաշարժ, ինչից հետո հայտարարվել էր մինչև 3 մետր բարձրությամբ ցունամիի վտանգ։