Իսրայելի բանակը զգուշացրել է Լիբանանի հարավի բնակիչներին չվերադառնալ իրենց տներ

Իսրայելի պաշտպանության բանակը (IDF) նախազգուշացրել է Լիբանանի հարավի 55 բնակավայրերի բնակիչներին՝ չվերադառնալ իրենց տներ՝ հրադադարի փխրուն պայմաններում։

IDF-ի խոսնակ գնդապետ Ավիչայ Ադրաեն X հարթակում նշել է, որ հրադադարի համաձայնագրի ընթացքում իսրայելական զորքերը շարունակում են մնալ իրենց դիրքերում՝ «Հեզբոլլահի շարունակվող ահաբեկչական գործունեության պայմաններում»։ Նրա խոսքով՝ «ձեր անվտանգության համար չպետք է վերադառնաք ձեր բնակավայրեր մինչև հետագա ծանուցում»։

Նա նաև կոչ է արել չմոտենալ Լիտանի գետի տարածքին, Վադի ալ-Սալհանիին և Սալուկիին։

Ադրաեն հրապարակել է նաև արաբերեն քարտեզ, որտեղ նշված են Լիբանան-Իսրայել սահմանից 4-10 կմ հեռավորության վրա գտնվող գյուղերը, որոնց բնակիչներին արգելվում է վերադառնալ։

Հիշեցնենք, որ Իսրայելի և Լիբանանի միջև 10-օրյա հրադադարը ուժի մեջ է մտել ապրիլի 17-ին։ Համաձայնագիրը ստորագրվել է Լիբանանի նախագահ Ժոզեֆ Աունի և Իսրայելի վարչապետ Բենյամին Նեթանյահուի կողմից՝ ԱՄՆ նախագահ Դոնալդ Թրամփի միջնորդությամբ։ Այն դիտարկվում է որպես երկու երկրների միջև երկարաժամկետ համաձայնության բանակցությունների առաջին քայլ։ Այս մասին հայտնում է TASS-ը։