Հայաստանը և Շվեդիան ամրապնդում են համագործակցությունը միգրացիայի կառավարման ոլորտում. Երևանում տեղի է ունեցել երկօրյա աշխատաժողով

«Միգրացիայի կառավարման և ինտեգրման հզորացում. Շվեդիա-Հայաստան երկկողմ նախաձեռնություն 2025-2029» ծրագրի շրջանակներում Երևանում անցկացվել է Շվեդիայի միգրացիոն գործակալության ապաստանի, արգելանքի և վերադարձի ընթացակարգերին նվիրված երկօրյա աշխատաժողով։

Միջոցառման մեկնարկին ողջույնի խոսքով հանդես են եկել ՀՀ Միգրացիայի և քաղաքացիության ծառայության պետի տեղակալ Իրինա Դավթյանը և Հայաստանում Շվեդիայի միգրացիոն գործակալության երկարաժամկետ խորհրդական Օսա ֆոն Հեյքինգ Դեյուսը։

 

Աշխատաժողովի առանցքային նպատակն էր մասնակիցներին ծանոթացնել միգրացիոն գործընթացների վերաբերյալ ԵՄ պահանջներին, ներկայացնել Շվեդիայում ապաստանի գործերի համակարգի զարգացման ու կառավարման առանձնահատկությունները։

 

Ապրիլի 14-ին և 16-ին անցկացված աշխատաժողովների ընթացքում Շվեդիայի միգրացիոն գործակալության փորձագետներ Ժանեթ Շերսգորդը, Քրիստինա Ռեննարն և Թերեզ Լունդգրենը ներկայացրել են ապաստանի հայտերի ընդունման, գրանցման, կացության տրամադրման, ինչպես նաև ապացույցների գնահատման և որոշումների բողոքարկման շվեդական փորձը։

 

Զուգահեռաբար անդրադարձ է կատարվել վերադարձի և արգելանքի (պահման) հիմնախնդիրներին՝ շեշտադրելով մարդասիրական, արժանապատիվ և կայուն վերադարձի ապահովման, ինչպես նաև արտաքսման որոշումների կայացման ու կատարման արդյունավետ մեխանիզմները։

Այս նախաձեռնությունը կարևոր քայլ է Հայաստանի միգրացիոն համակարգը եվրոպական չափանիշներին համապատասխանեցնելու և երկկողմ գործընկերային համագործակցությունն ընդլայնելու ճանապարհին։