Պետականության հիմքերը խարխլում են նրանք, ովքեր մշտապես խոսում են «ինքնիշխանությունից», բայց անպատիժ խախտում են օրենքներն ու ներքին կանոնները. Հայր Ռուբեն

Մասյացոտնի թեմի առաջնորդական տեղապահ Հոգեշնորհ Տեր Ռուբեն վարդապետ Զարգարյանը «Օրենքից վեր՝ հանուն օրենքի» վերտառությամբ հրապարակում է արել։

Հայր Սուրբն ընդգծել է՝ երբ գործադիր իշխանությունն իրեն վեր է դասում Սահմանադրությունից և օրենքներից, ճեղքվածք է առաջանում իշխանության և օրինականության միջև։

Այս ընթացքը, Հայր Ռուբենի խոսքով, երկարաժամկետ կտրվածքով թուլացնում է քաղաքացիների վստահությունը և խոցելի դարձնում ինքնիշխանության գաղափարը, որը կառավարության սեփականությունը չէ, այլ պատկանում է ժողովրդին և նրա հաստատություններին։

«Ամենավտանգավոր երևույթներից մեկը «պետություն» և «կառավարություն» հասկացությունների խառնուրդն է։ Երբ իշխանավորները խոսում են այնպես, ասես իրենք են մարմնավորում պետությունը, ցանկացած քննադատություն ընկալվում է որպես հարձակում պետության վրա, որով խեղդվում է բազմակարծությունը, իսկ ընդդիմադիր հայացքները համարվում են կասկածելի՝ ճնշման կամ լռեցման ենթակա։

Գործադիր իշխանության կողմից Սահմանադրության շարունակական խախտումներն աստիճանաբար ունայնացնում են վերահսկող հաստատությունների բովանդակությունը (դատարաններ, խորհրդարան, անկախ մարմիններ)։ Երբ վերջիններս այլևս ի զորու չեն իրական հավասարակշռություն ապահովելու, ձևավորվում է իշխանության կենտրոնացման վտանգավոր միտում, որը միշտ սպառնալիք է պետության կայունության համար։

Պետականության հիմքերը, ըստ էության, խարխլում են նրանք, ովքեր մշտապես խոսում են «ինքնիշխանությունից», բայց անպատիժ խախտում են օրենքներն ու ներքին կանոնները։ Պետությունը, որ չի երաշխավորում իր իրավական կարգը, դառնում է ավելի խոցելի արտաքին և ներքին ճնշումների հանդեպ, որովհետև կորցնում է իր վստահելիությունն ու հետևողականությունը։

Այս գործընթացները խորապես բաժանում են հասարակությունը․ մի կողմում հայտնվում են իշխանությանը սատարողները, մյուս կողմում այն անօրինական համարողները։ Այդ բևեռացումը կարող է վերածվել ինստիտուցիոնալ կամ սոցիալական ճգնաժամերի՝ անկանխատեսելի հետևանքներով։

Գլխավոր վտանգը ոչ թե առանձին քաղաքական սխալն է, այլ որ իշխանությունը կտրվում է օրենքից և պատասխանատվությունից։ Այդ պահին պետությունը դադարում է իրավունքի վրա հիմնված համայնք լինելուց և վերածվում է գործիքի՝ իշխանավորների ձեռքում»,- նշել է Հայր Ռուբենը։