47 մլն դոլար վաղաժամ վարկ ենք մարել, սակագները կնվազեն․ Ռոմանոս Պետրոսյան

Մեզ հաջողվեց ամիսներ տևած ժամանակավոր կառավարման արդյունքում այնպիսի խնայողություններ ձևավորել, ընկերության ֆինանսատնտեսական վիճակն այնպիսի բարվոք և լավ վիճակի հասցնել, որ առանց հավելյալ միջոցներ ներգրավելու, առանց հավելյալ ֆինանսական բեռ ստանձնելու՝ մեզ հաջողվեց ոչ միայն ավելի քան 47 մլն դոլարի վարկային պարտավորություններ մարել։ Հանրային ծառայությունները կարգավորող հանձնաժողովի նիստից առաջ լրագրողների հետ զրույցում նման հայտարարություն է արել ՀԷՑ–ի ժամանակավոր կառավարիչ Ռոմանոս Պետրոսյանը։ Հանրային ծառայությունները կարգավորող հանձնաժողովի այսօրվա նիստի օրակարգում ՀԷՑ–ի նոր բաժանորդ դառնալու սակագները 30-40 տոկոս իջեցնելու նախագիծն էր քննարկվում։

ՀԷՑ ժամանակավոր կառավարիչ Ռոմանոս Պետրոսյանը լրագրողների հետ զրույցում հայտնեց, որ որոշման նախագիծն արդեն շրջանառության մեջ է դրված․ «Մի քանի ամիս տևած հաշվարկների, վերլուծությունների, այդ թվում նաև ՀԾԿՀ գործում ջանքի արդյունքում, ՀԷՑ–ի նախաձեռնությամբ վճարման այդ չափերը նվազեցվում են 30-40 տոկոս»,–ասաց Պետրոսյանը։

Դիտարկմանը, որ այս քայլը, ինչպես թոշակների բարձրացումը, նախընտրական քարոզչության տրամաբանության մեջ է, Պոմանոս Պետրոսյանն ասաց. «Ես չգիտեմ՝ ով ինչ կհամարի, ով ինչպես կդիրքավորվի համապետական ընտրություններից առաջ, ով ինչը ինչով կպայմանավորի, բայց փաստը մնում է այն, որ գործող սակագնի մեջ, չբարձրացնելով գործող սակագինը մեզ հաջողվեց ամիսներ տևած ժամանակավոր կառավարման արդյունքում այնպիսի խնայողություններ ձևավորել, ընկերության ֆինանսատնտեսական վիճակն այնպիսի բարվոք և լավ վիճակի հասցնել, որ առանց հավելյալ միջոցներ ներգրավելու, առանց հավելյալ ֆինանսական բեռ ստանձնելու մեզ հաջողվեց ոչ միայն ավելի քան 47 մլն դոլարի վարկային պարտավորություններ մարել, ընդ որում գրեթե կեսը վաղաժամկետ կարգով, այլ նաև հաջողվեց այս կարևորագույն բարեփոխումն իրականացնել, որը յուրաքանչյուր կառուցապատողի, յուրաքանչյուր քաղաքացու, որը բնակարան ձեռք բերելու, առանձնատուն կառուցելու միտք ունի, իր ծախսերը կոնկրետ էլեկտրաէներգիայի մատակարարման սպառման համակարգը բաշխման ցանցին միացնելու մասով զգալիորեն նվազեցվելու է։ Սա արվում է գործող սակագնի պայմաններում»։