«Կան ազատումներ, որոնք դատական գործընթացով վիճարկվում են և ազատման որոշումներ, որոնք դատարանով բեկանվել են»․ Ռոմանոս Պետրոսյան

«Կան ազատումներ, որոնք դատական գործընթացով վիճարկվում են և ազատման որոշումներ, որոնք դատարանով բեկանվել են»։ Այս մասին այսօր ՀԾԿՀ նիստից առաջ հայտարարել է ՀԷՑ ժամանակավոր կառավարիչ Ռոմանոս Պետրոսյանը՝ պատասխանելով լրագրողների հարցին, թե ինչպես է ստացվում, որ իր նշանակումից հետո ՀԷՑ-ում տեղի ունեցած կադրային ջարդը դատարանը ապօրինի որոշում է համարել․ «ՀԷՑ–ից ազատվել են բացառապես այն աշխատակիցները, որոնք ստորին օղակներից մինչև ամենավերին օղակներ, ուղիղ կամ անուղղակիորեն ներգրավված են եղել ֆինանսատնտեսական մեքենայությունների առերևույթ հանցակազմի հատկանիշներ պարունակող հանգամանքների ու փաստերի մեջ։ Երկրորդը, ազատվել են այն մարդիկ, որոնք կոմպետենտ չեն եղել այդ պաշտոններում և առնվազն իմ և իմ թիմի հայեցողական վստահությունը չեն վայելել։

Երրորդը, այո, մի քանի տասնյակ դատական գործեր կան վիճարկելու այդ ազատումները, բայց չունենք գեթ մեկ վճիռ, որով դատարանը վերականգնման վճիռ է կայացրել; Բոլոր դեպքերում որոշակի փոխհատուցման վճիռներ են կայցվել՝ հօգուտ մեր քաղաքացիների։ ՀԷՑ–ից ազատված քաղաքացիներն էլ մեր քաղաքացիներն են և պետությունը հանձնառու է նրանց համար։ Մենք բոլոր վճիռները բողոքարկել ենք վերաքննիչ ատյաններում»,–ասաց նա։