Արա Մկրտչյանը հանդես է եկել ելույթով Աստանայում անցկացվող ՄԱԿ-ի տարածաշրջանային բնապահպանական գագաթնաժողովի շրջանակում

 

Աստանայում անցկացվող ՄԱԿ-ի տարածաշրջանային բնապահպանական գագաթնաժողովի շրջանակում տեղի է ունեցել Կենտրոնական Ասիայի երկրների կողմից նախաձեռնված «Բնության հետ ներդաշնակություն՝ հանուն տարածաշրջանի կայուն զարգացման» նախաձեռնության մեկնարկը։

Համաժողովին նախարարի տեղակալ Արա Մկրտչյանը հանդես է եկել ելույթով՝ ՄԱԿ-ի Կենսաբազմազանության մասին կոնվենցիայի Կողմերի 17-րդ համաժողովի (COP17) նախագահ Համբարձում Մաթևոսյանի անունից։

Իր խոսքում նախարարի տեղակալը ողջունել է տարածաշրջանային նախաձեռնության մեկնարկը՝ ընդգծելով, որ այն վկայում է Կենտրոնական Ասիայի երկրների քաղաքական կամքի մասին՝ ամրապնդելու համագործակցությունը կենսաբազմազանության պահպանության և բնական ռեսուրսների կայուն կառավարման ոլորտում։

 

Արա Մկրտչյանը նշել է, որ տարածաշրջանը, ունենալով եզակի էկոհամակարգեր և հարուստ կենսաբազմազանություն, միաժամանակ կանգնած է կլիմայի փոփոխության, հողերի դեգրադացիայի և այլ մարտահրավերների առաջ, ինչը պահանջում է համատեղ և համակարգված գործողություններ։

Ելույթում հատուկ ընդգծվել է, որ նախաձեռնության շրջանակում նախատեսվող տարածաշրջանային ծրագրերի և գործողությունների պլանի մշակումը հնարավորություն կտա առավել արդյունավետորեն իրականացնել Կունմին-Մոնրեալի կենսաբազմազանության գլոբալ շրջանակի նպատակները, ինչպես նաև խթանել գիտելիքների և լավագույն փորձի փոխանակումը տարածաշրջանի երկրների միջև։

Նախարարի տեղակալը նաև անդրադարձել է այս տարվա հոկտեմբերին Հայաստանում կայանալիք ՄԱԿ-ի Կենսաբազմազանության մասին կոնվենցիայի Կողմերի 17-րդ համաժողովին՝ նշելով, որ այն կարևոր հարթակ է լինելու գլոբալ առաջընթացի գնահատման և միջազգային համագործակցության խորացման համար։

 

Նշվել է, որ հոկտեմբերի 16-ին նախատեսվող առաջնորդների գագաթնաժողովը հնարավորություն կընձեռի ներկայացնելու տարածաշրջանային նախաձեռնությունները, այդ թվում՝ «Բնության հետ ներդաշնակություն» նախաձեռնությունը՝ որպես ներդրում գլոբալ բնապահպանական օրակարգում։

Համաժողովի շրջանակում քննարկվել են նաև կենսաբազմազանության պահպանության ուղղությամբ տարածաշրջանային համագործակցության խորացման, համատեղ ծրագրերի իրականացման և ֆինանսական ու տեխնիկական ռեսուրսների համախմբման հարցեր։

Հայաստանը, որպես COP17 համաժողովի հյուրընկալող երկիր, պատրաստակամ է աջակցելու նախաձեռնության առաջմղմանը և դրա միջազգային ճանաչելիության բարձրացմանը։