ԵՄ-ի բազմամիլիարդ եվրոյի վարկը Ուկրաինայի համար կարող է չբավարարել

Եվրամիության կողմից Ուկրաինային հատկացված 90 միլիարդ եվրոյի վարկը կարող է բավարար չլինել երկրի ֆինանսական կարիքները հոգալու համար։ Այս մասին գրում է The Wall Street Journal-ը՝ հղում անելով դիվանագիտական աղբյուրներին։

Դիվանագետների գնահատմամբ՝ Ուկրաինայի ֆինանսավորման դեֆիցիտը աճել է նախնական հաշվարկներից հետո, և հաջորդ տարվա բյուջետային պահանջները փակելու համար անհրաժեշտ է լրացուցիչ մոտ 19 միլիարդ եվրո։ Սա նշանակում է, որ ԵՄ առաջնորդները կարող են ստիպված լինել կրկին քննարկել նոր՝ բազմամիլիարդ վարկի տրամադրումը մոտակա մեկ տարվա ընթացքում։

Վարկը նախատեսված էր ծածկելու Ուկրաինայի հիմնական բյուջետային և պաշտպանական ծախսերի շուրջ երկու երրորդը 2026-2027 թվականներին։ Միաժամանակ նշվում է, որ Ճապոնիան և մի շարք արևմտյան երկրներ բանակցություններ են վարում լրացուցիչ ֆինանսավորման շուրջ, սակայն առայժմ կոնկրետ միջոցներ չեն տրամադրվել։