SIPRI. Համաշխարհային ռազմական ծախսերը 2025 թվականին հասել են 2.887 տրիլիոն դոլարի

Ստոկհոլմի միջազգային խաղաղության հետազոտությունների ինստիտուտի (SIPRI) նոր զեկույցի համաձայն՝ 2025 թվականին համաշխարհային ռազմական ծախսերը հասել են 2.887 տրիլիոն դոլարի, ինչը 2.9%-ով ավելի է, քան 2024 թվականին։

Ինստիտուտի փորձագետների տվյալներով՝ այս ծախսերը նվազել են Միացյալ Նահանգներում, բայց աճել են 14%-ով Եվրոպայում և 8.1%-ով Ասիայում և Օվկիանիայում։ Ռազմական ծախսերի ամենամեծ ծավալ ունեցող երեք երկրները՝ Միացյալ Նահանգները, Չինաստանը և Ռուսաստանը, միասին ծախսել են 1.480 տրիլիոն դոլար, կամ համաշխարհային ընդհանուրի 51%-ը։

Ռազմական ծախսերը աճել են 11-րդ տարին անընդմեջ։ ՀՆԱ-ում դրանց բաժինը հասել է 2.5%-ի, ինչը ամենաբարձր մակարդակն է 2009 թվականից ի վեր։ Չնայած տարեկան 2.9% աճի տեմպը զգալիորեն ցածր էր 2024 թվականի 9.7%-ից, այս դանդաղումը մեծապես բացատրվում է Միացյալ Նահանգներում այս ոլորտում ծախսերի անկմամբ, նշում են ինստիտուտի փորձագետները։ Միացյալ Նահանգներից դուրս ընդհանուր ծախսերը 2025 թվականին աճել են 9.2%-ով:

Այս ցուցանիշով 2025 թվականին առաջատար հնգյակում էին Միացյալ Նահանգները, Չինաստանը, Ռուսաստանը, Գերմանիան և Հնդկաստանը, որոնք միասին կազմել են համաշխարհային ռազմական ծախսերի 58%-ը: