Ռուսաստանը AI ոլորտում հիմնական գործընկերներ է տեսնում ԲՐԻԿՍ-ում և ՇՀԿ-ում

Ռուսաստանը պատրաստ է արհեստական բանականության ոլորտում համագործակցել առաջին հերթին ԲՐԻԿՍ և Շանհայի համագործակցության կազմակերպության (ՇՀԿ) երկրների հետ։ Այս մասին «Լենտա.ռու»-ին տված մեկնաբանությունում նշել է ՄԳԻՄՕ-ի միջազգային լրագրության ամբիոնի դոցենտ Մարինա Կրինժինան։

Փորձագետի խոսքով՝ Ռուսաստանում որդեգրված տեխնոլոգիական ինքնիշխանության քաղաքականությունը չի նշանակում մեկուսացում։ Նա ընդգծել է, որ Մոսկվան պատրաստ է համագործակցել այն երկրների հետ, որոնք կիսում են իր մոտեցումները՝ տեխնոլոգիաների հավասար հասանելիության, համագործակցության և մշակութային առանձնահատկությունների հարգանքի հարցում։

Միաժամանակ, Կրինժինայի գնահատմամբ, Արևմուտքի հետ արհեստական բանականության ոլորտում համագործակցությունը ներկայում բարդացած է։ Նրա կարծիքով՝ այն հնարավոր է միայն համընդհանուր կանոնների մշակման շրջանակում՝ ՄԱԿ-ի հովանու ներքո, սակայն եվրոպական երկրներն ու ԱՄՆ-ն այս ուղղությամբ բավարար հետաքրքրություն չեն ցուցաբերում։ Ավելի վաղ քաղաքագետ Յուրի Կոլոտաևը նշել էր, որ պետությունները արհեստական բանականությունը դիտարկում են որպես ռազմավարական ռեսուրս։