Ի՞նչ չի կարելի անել ինսուլտի դեպքում․ բժիշկները նշել են երեք վտանգավոր սխալ

Բրիտանացի թերապևտ Նաիլյա Ասլամը և ինսուլտի դեմ պայքարի ասոցիացիայի ներկայացուցիչ Էմիլի Հերդը նշել են երեք կարևոր սխալ, որոնք չի կարելի թույլ տալ ինսուլտի կասկածի դեպքում առաջին օգնություն ցուցաբերելիս։ Այս մասին հայտնում է Independent-ը։

Մասնագետների խոսքով՝ առաջին հերթին չի կարելի տուժածին տալ սնունդ, հեղուկ կամ դեղամիջոցներ, հատկապես՝ ասպիրին։ Ասլամը բացատրել է, որ ինսուլտի ժամանակ մարդիկ հաճախ ունենում են կուլ տալու խնդիրներ, և կա խեղդվելու վտանգ, երբ սնունդը կամ հեղուկը կարող է հայտնվել շնչուղիներում։ Բացի այդ, նա զգուշացրել է, որ տուժածին ինքնուրույն հիվանդանոց տեղափոխելու փորձը կարող է վտանգավոր լինել, քանի որ ճանապարհին նրա վիճակը կարող է կտրուկ վատանալ։

Իր հերթին Էմիլի Հերդը հորդորել է չսպասել, թե ախտանշանները կանցնեն ինքնուրույն։ Նրա խոսքով՝ նույնիսկ եթե թվում է, որ վիճակը բարելավվել է, անհրաժեշտ է անհապաղ դիմել բժշկական օգնության և անցնել հետազոտություն։ Ավելի վաղ մասնագետները նշել էին, որ ինսուլտը կարելի է ճանաչել պարզ մեթոդով՝ ուշադրություն դարձնելով մարդու դեմքին, խոսքին և ձեռքերի շարժմանը։